شىمكەنتتەگى جىلىجاي شارۋاشىلىعى قۇردىمعا كەتۋدىڭ الدىندا تۇر
سەبەبى سىرتتان كەلەتىن كوكونىستىڭ ۇلەسى كوبەيىپ، ىشكى نارىقتا ءۇش ەسە ارزان باعاعا ساۋدالانىپ جاتىر. ال ءونىمنىڭ وزىندىك قۇنىنا تىكەلەي اسەر ەتەتىن كوممۋنالدىق تولەمدەر قىمبات كورىنەدى. شارۋالار وسىلاي جالعاسا بەرسە، پرەزيدەنتتىڭ اتىنا اشىق حات جازۋعا ءازىرمىز دەيدى.
بۇل تۇركىستان وبلىسى مەن شىمكەنت قالاسىنداعى ەڭ ءىرى جىلىجاي كەشەندەرىنىڭ ءبىرى. اۋماعى 9 گەكتار القاپتى الىپ جاتىر. سوڭعى تەحنولوگيامەن سوعىلعاندىقتان كوكونىستىڭ ونىمدىلىگى مەن ساپاسى الدە قايدا جوعارى. ءبىراق شارۋالار دايىن ءونىمنىڭ وزىندىك قۇنى اسپانداپ، ىشكى نارىققا شىعارۋ قيىنداپ كەتتى دەيدى. ونىڭ سەبەبىن كوممۋنالدىق تولەمنىڭ قىمباتشىلىعىمەن بايلانىستارادى.
نۇربەرگەن قويلىبايەۆ، جىلىجايدىڭ باس اگرونومى:
- قيار ءوزىن اقتاۋ ماسەلەسى وتە قيىن بولىپ جاتىر. ويتكەنى تۇرىكمەنستان، وزبەكستان، تاجىكستان بولسىن ەلدەردەن كەلەتىن جەمىس- جيدەكتەر وتە ارزان. بىزدەگى باعامەن باسەكەلەس بولۋ قيىن. كورشى ەلدەرمەن باسەكەگە توتەپ بەرۋ قيىنداعان تۇستا شارۋلاردىڭ ءىسى تۇرالاپ، شىعىندى وتەۋمەن شەكتەلىپ جاتىر. بۇلاي جالعاسا بەرسە ەڭبەك اقتالماي، جۇمىسشىلاردىڭ ءىسى كەرى كەتۋى مۇمكىن.
ءلاززات جاحانشايەۆا، جۇمىسشى:
- ولار بىزگە كۇنىنە 4 مىڭ تەڭگەدەن تولەيدى. كۇن اقىسى. يەسى قينالسا دا تاۋىپ بەرەدى. ءبىر كۇندەي تۇرىپ قالادى. جابىلىپ قالسا نە بولادى دەگەن ۋايىم بولىپ جاتىر. يەلەرىنە راقمەت، قينالسا دا اپتا سايىن اقشامىزدى تاۋىپ بەرىپ جاتىر.
قۇردىمعا كەتكەن شارۋا قوجالىقتارى جىلىجاي قاۋىمداستىعىنان كومەك سۇراپ، كۇندە كەلەدى. جىلىجاي سالعاندار قىمبات كوممۋنالدىق تولەم ءۇشىن مەملەكەتتەن سۋبسيديا بەرىلسە ەكەن دەيدى.
مىرزاحمەت سىنابايەۆ، قالالىق جىلىجاي قاۋىمداستىعىنىڭ ءتوراعاسى:
- شارۋالاردىڭ دا ارىز- تالابى ورىندى. ويتكەنى ءوندىرىپ جاتقان ءونىمنىڭ ءوزى 120-130 ميلليارد تەڭگەنىڭ اينالاسىندا. سونىڭ % 10 سۋبسيديالاپ بەرسە جەتەدى. كوگىلدىر وتىنىمىز بىزدە 1 كۋب/م 37 مىڭ تەڭگە. ال تۇرىكمەنستاندا ول 45 تەڭگە بولادى. سونىمەن بۇل باسەكەلەستىككە تۇرا الماي جاتىر.
ەلەكتر ەنەرگياسى مەن جىلۋ قۋاتىنا شىعىن كوبەيگەن تۇستا ديقانداردىڭ كوبى ەگىن ماۋسىمىن اۋىستىرىپ الەك. قىمباتشىلىقتى وسىلاي اينالىپ وتۋگە ءماجبۇر.
ءابۋناسىر جانباتىروۆ، قالالىق اۋىلشارۋاشىلىعى جانە ۆەتەريناريا باسقارماسى باسشىسىنىڭ ورىنباسارى:
- بىزدە جالپى 204 گ ا جىلىجاي بار. ونىڭ ىشىندە فەرمەرلىگى بار، قولدان جاسالعاندارى بار، ودان كەيىن وندىرىستىك بار. فەرمەرلىك جىلىجايلار كوبىنەسە شىعىندارىن اقتاي الماي، قازىر ۋاقىتشا توقتاپ تۇر. ءونىمى بار، ساۋداسى جوق ديقاندار ەندى پرەزيدەنت قاسىم- جومارت توقايەۆتان قولداۋ كۇتەدى.
جاعدايدى جۇيەلۋگە ات سالىسىپ، كوممۋنالدىق قىزمەتتىڭ سۋبسيدياسىن شەشىپ بەرسە ەكەن دەيدى ولار.
www.24.kz
