رەسەيدىڭ «اەروفلوت» اۋە كومپانياسى حالىقارالىق رەيستەردى توقتاتادى

نۇر- سۇلتان. قازاقپارات - «اەروفلوت» اۋە كومپانياسىنىڭ اقپاراتى بويىنشا، ۇشۋدى ورىنداۋعا كەدەرگى كەلتىرەتىن قوسىمشا جاعدايلاردىڭ تۋىنداۋىنا بايلانىستى «اەروفلوت» اۋە كومپانياسى بارلىق حالىقارالىق رەيستەردى 2022 -جىلعى 8- ناۋرىز ماسكەۋ ۋاقىتى بويىنشا ساعات 00:00-دەن باستاپ ۋاقىتشا توقتاتادى.

«توقتاتىلعان رەيستەردىڭ جولاۋشىلارى اۆيابيلەتتى ساتىپ الۋ ورنى بويىنشا بيلەتتىڭ قۇنىن تولىق قايتارۋدى رەسىمدەي الادى. پايدالانىلماعان تاسىمالداۋ ءۇشىن قايتارۋدى اعىمداعى جىلدىڭ سوڭىنا دەيىن كەز كەلگەن ۋاقىتتا جۇرگىزۋگە نەمەسە مارشرۋتتى ساقتاي وتىرىپ، ونى اعىمداعى جىلدىڭ سوڭىنا دەيىن ايىپپۇلسىز باسقا كۇندەرگە قايتا رەسىمدەۋگە بولادى. جولاۋشىلارعا اۋە كومپانيانىڭ اقپاراتتىق حابارلامالارىن جانە برونداۋ كەزىندە كورسەتىلگەن بايلانىس دەرەكتەرى بويىنشا جەكە اقپاراتتى قاداعالاۋ ۇسىنىلادى. تولىق اقپارات اۋەكومپانيانىڭ سايتىندا ورنالاستىرىلعان»، - دەلىنگەن كومپانيانىڭ Telegram كانالىندا.

اەروفلوت - رەسەيلىك ۇلتتىق اۋە تاسىمالداۋشى (%51- مەملەكەت مەنشىگىندە). ەڭ ءىرى رەسەيلىك اۋە كومپانيا. شتاب- پاتەرى ماسكەۋدە ورنالاسقان.