استانادا بالاباقشا تاربيەشىلەرى قانشا جالاقى الادى
«قازىرگى جاعداي بويىنشا «INDIGO: ەلەكتروندىق بالاباقشا» ەلەكتروندىق پورتالىندا 3 جاستان 6 جاسقا دەيىنگى 7 696 بالا كەزەكتە تىركەلگەن. بۇگىنگى تاڭدا ەلورداداعى بالاباقشالارعا 50,8 مىڭ بالا بارادى»، - دەلىنگەن قالالىق ءبىلىم باسقارماسىنىڭ قازاقپاراتتىڭ رەسمي ساۋالىنا بەرگەن جاۋابىندا.
قالادا ءتۇرلى تيپتەگى 430 مەكتەپكە دەيىنگى ۇيىم جۇمىس ىستەيدى. ولاردىڭ ىشىندە 99 مەملەكەتتىك جانە 314 جەكە مەنشىك مەمەكەم بار. ياعني، جىلدىق بيۋدجەتى 11,9 ميلليارد بولاتىن مەملەكەتتىك دوتاتسيا الاياسىندا 27,7 مىڭ تاربيەلەنۋشى ءتالىم الادى. رەسمي دەرەك بويىنشا، مەملەكەتتىك بالاباقشالارداعى تاربيەشىلەر 220 مىڭ تەڭگە، تاربيەشىنىڭ كومەكشىسى (كۇتۋشى) - 81,9 مىڭ تەڭگە الادى. مەملەكەتتىك بالاباقشانىڭ جالپى ءبىلىم بەرۋ توبىنداعى جان باسىنا شاققانداعى قارجىلاندىرۋ مولشەرى ايىنا 41,7 مىڭ تەڭگە بولادى. تاربيەلەنۋشىلەر كۇنىنە 10,5 ساعات بالاباقشا قاراۋىندا بولادى. اتا- انالار تولەمى ەسەبىنەن 16,8 مىڭ تەڭگە سوماسىندا تاڭعى اس، تۇسكى اس، تۇستەن كەيىنگى اس بەرىلەدى. تۇزەتۋ توبىندا جان باسىنا شاققانداعى قارجىلاندىرۋ مولشەرى 91,1 مىڭ تەڭگە بولادى.
مۇندا دا تاربيەلەنۋشىلەر كۇنىنە 10,5 ساعات بالاباقشا قاراۋىندا بولادى. بيۋدجەت ەسەبىنەن تاڭعى اس، تۇسكى اس، تۇستەن كەيىنگى اس قاراستىرىلعان. تاماقتاندىرادى، بۇدان باسقا تاربيەلەنۋشىلەر ءوز دەنساۋلىعىنا بايلانىستى مەديتسينالىق ەم- شارالار، فيزيوتەراپيا، ماسساج الادى.
«شاعىن ورتالىقتاردا - جان باسىنا شاققانداعى قارجىلاندىرۋ مولشەرى - 18066 تەڭگە. تاربيەلەنۋشىلەر جارتى كۇن بويى ورتالىقتىڭ قاراۋىندا بولادى. بۇل توپتاردا تاماقتانۋ قاراستىرىلماعان. ساناتوريلىك مەكتەپكە دەيىنگى بالالار ۇيىمدارىندا جان باسىنا شاققانداعى قارجىلاندىرۋ كولەمى - 78 840 تەڭگە (ونىڭ ىشىندە اي سايىنعى 16800 تەڭگە تاماقتاندىرۋ دا كىرەدى). تاربيەلەنۋشىلەر كۇنىنە 10,5 ساعات ماماندار باقىلاۋىندا بولادى. بيۋدجەت ەسەبىنەن بەرىلەتىن تاڭعى اس، تۇسكى اس، تۇستەن كەىنگى اس جانە كەشكى استان بولەك، اتالعان ۇيىمداردا يممۋنيتەتتى كوتەرۋ راسىمدەرى قاراستىرىلعان»، - دەپ جازىلعان باسقارمانىڭ اقپاراتىندا.
