دارىگەرلەر تۋبەركۋلەزدىڭ الدىن الۋ جولدارىن ايتتى
س ق و سانيتاريالىق-ەپيدەميولوگيالىق باقىلاۋ دەپارتامەنتى باسپا ءسوز قىزمەتىنىڭ مالىمەتىنشە، پروفيلاكتيكالىق جانە ەپيدەمياعا قارسى جۇرگىزىلگەن ءىس-شارالار كەشەنىنىڭ ارقاسىندا وڭىردە تۋبەركۋلەزبەن اۋىرۋ سوڭعى 5 جىل بويى تومەندەپ كەلەدى.
ماسەلەن، 2021-جىلى تۋبەركۋلەزبەن سىرقاتتانۋ %16 تومەندەگەن. 2020-جىلى جاڭادان 219 سىرقات تىركەلسە، بىلتىر 183 ادام دارىگەرلەردىڭ كومەگىنە جۇگىنگەن. نەگىزىنەن ەرەسەك ادامدار اۋىرادى، بالالار اراسىندا اۋرۋشاڭدىق تومەن.
«تۋبەركۋلەز قوزدىرعىشى الەمدە العاش رەت 100 جىل بۇرىن اشىلعانىنا قاراماستان، اۋرۋ ءالى كۇنگە دەيىن ادامدارعا ۇلكەن قاۋىپ توندىرەدى. سوندىقتان ساقتىقتى جوعالتۋعا بولمايدى. ويتكەنى بۇل اۋرۋ دەنەنىڭ بارلىق ءتىنىن زاقىمداۋى مۇمكىن. ءبىراق، كوبىنە تىنىس الۋ مۇشەلەرىندە قابىنۋ پروتسەسى ءجۇرىپ، زاقىمدايدى. بىلتىر سقو- دا جۇقتىرعانداردىڭ %93 تۋبەركۋلەز تىنىس الۋ اعزالارىندا بولعان»، - دەيدى سانيتارلىق دارىگەرلەر. ينفەكتسيا اۋرۋ ادامنان جۇعادى.
كوبىنەسە تۋبەركۋلەز اۋا- تامشى جولىمەن تارالادى. تۋبەركۋلەزبەن اۋىراتىن ناۋقاس جوتەلگەندە، تۇشكىرگەندە، سويلەگەندە قاقىرىق پەن سىلەكەيدىڭ ۇساق تامشىلارى اۋاعا تارايدى، ولاردا كوپتەگەن ميكوباكتەريالار بولادى.
«تۋبەركۋلەز ادامنىڭ جاسىنا، جىنىسىنا، الەۋمەتتىك جاعدايىنا قارامايدى. تۋبەركۋلەز ميكوباكتەرياسىن تۇرمىسى ناشارلار دا، بايلار دا بىردەي جۇقتىرادى. تۋبەركۋلەز ميكوباكتەرياسى اعزاعا تۇسكەننەن كەيىن تارالادى، ءبىراق مىندەتتى تۇردە ادامدا اۋرۋ تۋدىرمايدى. ولاردىڭ كوپشىلىگى ولەدى، ءبىراق كەيبىرى ومىرشەڭ بولادى. ول تەك ءبىراز جىلدان كەيىن عانا سىر بەرۋى مۇمكىن»، - دەيدى ماماندار.
تۋبەركۋلەزبەن اۋىرۋعا تۇرعىن ءۇي جاعدايلارى، دۇرىس تاماقتانباۋ، سترەسس، ۇيقىنىڭ بولماۋى، باسقا دەرتتەر اسەر ەتۋى مۇمكىن.
سانيتارلىق مادەنيەتىنىڭ تومەندىگى، ياعني گيگيەنالىق تالاپتاردى ساقتاماۋ دا ادامنىڭ اعزاسىن السىرەتەدى جانە اۋرۋدى قوزدىرادى.
الكوگول پايدالانىپ، تەمەكى شەگەتىندەر دە قاتەر توبىنا جاتادى. قاتەرلى اۋرۋ بالالار اراسىندا تاراماۋى ءۇشىن تۋبەركۋلەزگە قارسى ۆاكسيناتسيا جۇرگىزىلەدى.
جۇقتىرعان بالالاردى انىقتاۋ ءۇشىن تۋبەركۋلين سىنامالارى ءادىسى قولدانىلادى. مامانداردىڭ ايتۋىنشا، تۋبەركۋلەز اۋرۋىنىڭ الدىن الۋ ءۇشىن ەڭ باستىسى دەنساۋلىقتى شىنىقتىرىپ، يممۋنيتەتتى تومەندەتەتىن اۋرۋلاردان دەر كەزىندە ەمدەلىپ وتىرۋ قاجەت.
