كوروناۆيرۋستىڭ «وميكرون» شتامىن بالالار قالاي ەڭسەرەدى

الماتى. قازاقپارات - الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى ناريمان تابىنبايەۆ كوروناۆيرۋستىڭ «وميكرون» شتامى بالالارعا قالاي اسەر ەتەتىنى تۋرالى ايتتى، دەپ حابارلايدى قازاقپارات ءتىلشىسى.

«وكىنىشكە وراي، بالالاردا وميكرون شتامىن جۇقتىرىپ جاتىر. ستاتيستيكالىق مالىمەتتەرگە سۇيەنسەك، جىل باسىنان بەرى 1000 عا جۋىق بالا ەمدەلدى، 32 بالا جانساقتاۋ بولىمىندە جاتتى. ابروي بولعاندا ءولىم بولعان جوق. بۇگىنگى كۇنى ينفەكتسيالىق اۋرۋحانادا 10 بالا جاتىر، رەانيماتسيادا ناۋقاس بالا جوق»، - دەيدى ول.

ونىڭ ايتۋىنشا، وميكرون جۇقتىرعان بالالاردا كاتارالدى قۇبىلىستار بايقالادى: تۇشكىرۋ، جوتەلۋ، مۇرىننان سۋ اعۋ، دەنە قىزۋىنىڭ كوتەرىلۋى، ءيىس پەن ءدامنىڭ جوعالۋى. ال جوتەل پنيەۆمونياعا اكەلۋى مۇمكىن.

«سوندىقتان ءبىز وعان نەمقۇراي قاراي المايمىز. بالالارداعى اۋرۋ جەڭىل وتەدى دەپ ايتا المايمىز. ءبىز جەڭىل نەمەسە ورتاشا اۋىرلىقتاعى بالالاردى اۋرۋحاناعا جاتقىزۋعا تىرىسامىز. ولار تولىق جازىلعاننان كەيىن عانا ۇيىنە شىعادى. بۇگىنگى تاڭدا بالالار اراسىنداعى وميكرون شتاممىنا قاتىستى جاعداي باقىلاۋدا. قالادا جاڭادان انىقتالعان جاعدايلاردىڭ ازايۋ ءۇردىسى بايقالادى»، - دەدى سپيكەر.

بۇعان دەيىن ناريمان تابىنبايەۆ الماتىنىڭ ينفەكتسيالىق ستاتسيونارلارىندا كوروناۆيرۋسپەن اۋىراتىندار سانى بىرنەشە ەسە ازايعانى تۋرالى ايتقان بولاتىن.