ەتنومادەني بىرلەستىكتەر مەملەكەت باسشىسىنىڭ باستامالارىنا قولداۋ ءبىلدىردى

نۇر-سۇلتان. قازاقپارات - ەتنومادەني بىرلەستىكتەر پرەزيدەنت قاسىم-جومارت توقايەۆتىڭ باستامالارىنا قولداۋ ءبىلدىردى، دەپ حابارلايدى قازاقپارات.

«ءبىز، رەسپۋبليكالىق ەتنومادەني بىرلەستىكتەردىڭ باسشىلارى، بىرلەسكەن وتىرىستىڭ قورىتىندىسى بويىنشا مىنانى مالىمدەيمىز. بۇگىنگى تاڭدا رەسەي-ۋكراين قاقتىعىسىنا بايلانىستى حالىقارالىق احۋالدىڭ شيەلەنىسۋى جاعدايىندا ەلىمىزدىڭ پرەزيدەنتى ق. ك. توقايەۆ حالىقارالىق اۋديتوريانىڭ نازارىن جان-جاقتى ديالوگتى دامىتۋ قاجەتتىلىگىنە دۇرىس اۋدارىپ وتىر.

«امانات» پارتياسىنىڭ سەزىندە سويلەگەن سوزىندە ول: ء«بىزدىڭ ۇستانىمىمىز مەملەكەتىمىزدىڭ قاۋىپسىزدىگىن، ەگەمەندىگى مەن اۋماقتىق تۇتاستىعىن قامتاماسىز ەتۋدى كوزدەيدى. ءبىز 2010-جىلى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءسامميتىن وتكىزگەن ەل رەتىندە ەۋرازيالىق قاۋىپسىزدىكتىڭ تۇتاستىعى قاعيداتىنا بەيىلدىمىز... سوندىقتان ءبىز ەكى مەملەكەتتى كەلىسسوز ۇستەلىندە ورتاق ءتىل تابىسۋعا، ۋاعدالاستىق پەن كەلىسىمگە كەلۋگە شاقىرامىز. باسقا جول جوق. جاقسى جانجالدان جامان تاتۋلىق ارتىق. بەيبىتشىلىكسىز دامۋ بولمايدى»، - دەپ اتاپ ءوتتى.

سونىمەن قاتار، الەمدەگى گەوساياسي شيەلەنىستىڭ كۇشەيۋىنىڭ وسىناۋ قيىن جاعدايىندا قوعامىمىزدىڭ ىشكى توپتاسۋىن ساقتاۋ مىندەتى بۇرىنعىدان دا وزەكتى ءارى ماڭىزدى بولا تۇسۋدە.

ءبىز بارلىق جاۋاپتى قوعامدىق كۇشتەردى، ازاماتتارىمىزدى مەملەكەت باسشىسى ق. ك. توقايەۆتىڭ جاڭا باعىتى توڭىرەگىنە توپتاسۋعا، جالپى ۇلتتىق ىنتىماق پەن بىرلىكتى نىعايتۋعا، ەلدى دامىتۋعا باعىتتالعان جاسامپاز ساياساتىن قولداۋعا شاقىرامىز. ءبىز بەيبىت اسپان، ءار شاڭىراقتا بەرەكە-بىرلىكتى ساقتاۋ - كەلەشەك ۇرپاق الدىنداعى قاسيەتتى ورتاق بورىشىمىز ەكەنىنە تەرەڭ سەنىمدىمىز. جاڭا قازاقستاندى بىرگە قۇرايىق!»، - دەلىنگەن ەتنومادەني بىرلەستىكتەردىڭ مالىمدەمەسىندە.