بەيتانىس ادامنىڭ كولىگىنە وتىرماڭىز

ارباۋعا ءتۇسىپ، سان سوعىپ قالماس ءۇشىن ءبىز سىزدەرگە مىناداي ساقتىق شارالارىن ەستە ۇستاۋعا كەڭەس بەرەمىز:
♦ۇرى- قارىدان ساق ءجۇرۋدى ۇمىتپاۋ كەرەك. كەي- كەيدە ۇيرەنشىكتى داعدىدان بولەك، مىسالى، جۇمىسقا، قوناققا باراردا ۇيرەنشىكتى جولدان باسقا جولمەن ءجۇرىپ تۇرۋ كەرەك. قاي جول قاۋىپسىز، جارىق، ادامى كوپ ەكەنىن بىلە جۇرگەن دۇرىس.
♦ەگەر تۇنگى ۋاقىتتا جۇرەر بولساڭىز، نەعۇرلىم قاۋىپسىز جولدى تاڭداڭىز. قاراڭعى، بۇرىلىس- قالتارىسى كوپ جەرلەرمەن، قوقىس ماڭىمەن جۇرمەڭىز. جالعىز جۇرگەندە جەراستى جولىمەن، تۇيىق كوشەلەرمەن وتپەۋگە تىرىسىڭىز.
♦قاراڭعى ءتۇسىپ كەتىپ، جۇمىستان كەش ورالاتىن، جولاي ءبىر جەرگە بۇرىلاتىن بولساڭىز، بۇل جونىندە جاقىندارىڭىزعا ەسكەرتىپ قويىڭىز.
♦بەيتانىس ادامنىڭ كولىگىنە وتىرماڭىز. اسىرەسە بۇل جاس قىزدارعا قاتىستى. ەگەر قاراڭعىدا جول شەتىندە تۇرساڭىز نەمەسە ءجۇرىپ كەلە جاتقاندا جانىڭىزعا كولىك توقتاپ، ءسىزدى سويلەسۋگە شاقىرسا، وندا وعان، كولىك ىشىنە ءۇڭىلىپ قاراماڭىز. ادامنىڭ سۇستى، كۇدىكتى ەكەنىن بايقاساڭىز، وندا كومەك شاقىرا ايقايلاپ، كولىكتىڭ قارسى بەتىنە قاراي قاشىڭىز.
♦جاسوسپىرىمدەر، بويجەتكەندەر باسقوسۋعا بارار بولسا، بۇل جونىندە تۋىستارىنا ەسكەرتكەنى دۇرىس. سەبەبى سوڭعى كەزدەرى جاستار اراسىندا ءىز- ءتۇزسىز جوعالىپ كەتۋ فاكتىلەرى جيىلەگەن. كوڭىل كوتەرەتىن جەرلەردە وتىرعاندا ۇرى- قارى، قاراقشى، قىلمىسكەردىڭ جەمتىگىنە ۇشىراماس ءۇشىن وتە ساق ءجۇرۋ كەرەك.
♦ۇيدەن، ءدامحانا، تويحانادان، تۇنگى كلۋبتان شىققان كەزدە ۇيدەگىلەرگە بۇل جونىندە حابارلاڭىز. قانشا ۋاقىتتا باراتىنىڭىزدى ەسكەرتىڭىز. بەيتانىس ادام ۇيىڭىزگە جەتكىزىپ سالامىن دەسە، كولىگىنە ويلانباي وتىرا كەتپەڭىز.
♦الىس ساپاردان شىققان جاعدايدا بىرەۋلەرمەن ساپارلاس بولساڭىز، ولارعا وزىڭىزدە قانداي باعالى زاتتار، قانشا اقشا بارىن ايتپاڭىز.
♦قوناقۇيگە ورنالاسقاندا بولمە ەسىگىنىڭ قۇلپىنا، تەلەفونعا ءمان بەرىڭىز، ولار مىعىم، جۇمىس جاعدايىندا بولۋى كەرەك. بولمە تەرەزەسى، بالكونى سەنىمدى بولسىن. سونداي- اق بولمە كىلتى قاۋىپسىز جەردە ساقتالا ما، جوق الدە قالاي بولسىن سولاي قويىلا سالا ما، وسىعان دا ءمان بەرىڭىز.
♦قىسقاسى، قاي جەردە جۇرسەڭىز دە ساقتىق شارالارىن ويىڭىزدان شىعارماڭىز. سوندا ءسىز الاياقتاردان، قىلمىسكەرلەردەن امان بولاسىز.
Zamana.kz