زاعيپ جاندارعا پەرنەتاقتا ويلاپ تاپقان اقتوبەلىك وقۋشىلار وليمپيادا جۇلدەگەرى اتاندى

اقتوبە. قازاقپارات - زاعيپ جاندارعا پەرنەتاقتا ويلاپ تاپقان اقتوبەلىك وقۋشىلار مەكسيكادا وتكەن حالىقارالىق وليمپيادادا جۇلدەگەر اتاندى، دەپ حابارلايدى قازاقپارات ءتىلشىسى.

اقتوبەدەگى نازاربايەۆ زياتكەرلىك مەكتەبىنىڭ 10-سىنىپ وقۋشىلارى جاننۇر ءايىپ پەن دانيار چۋتەنيەۆ Expo Sciences Mexico حالىقارالىق ۆيرتۋالدى وليمپياداسىندا كۇمىس مەدال جەڭىپ الدى. ولار وليمپيادادا ناشار كورەتىن جانە زاعيپ جاندارعا ارنالعان « Braille Board» اتتى پەرنەتاقتا جوباسىن ۇسىندى. وقۋشىلار قولدا بار جوبانى جىل بويى جەتىلدىرىپ كەلەدى. «ءبىزدىڭ قۇرىلعى التى باتىرمادان تۇرادى. وسى التى باتىرمانى باسۋ ارقىلى كومپيۋتەرگە ارىپتەردى نەمەسە تاڭبالاردى ەنگىزۋگە بولادى. بولاشاقتا پاتەنت الۋدى جوسپارلاپ وتىرمىز. ويتكەنى بۇل شىنىمەن دە بىرەگەي جوبا»، - دەدى جاننۇر ءايىپ.

مەكتەپ وقۋشىلارى جاساعان پەرنەتاقتا كولەمى شاعىن. ءتىپتى ادامنىڭ الاقانىنا سىيىپ كەتەدى. وقۋشىلار جاڭا قۇرىلعىنى اقتوبە قالالىق زاعيپ جانە ناشار كورەتىن ازاماتتارعا ارنالعان كىتاپحاناعا اپارىپ، پەرنەتاقتانى سىناقتان وتكىزىپ كوردى.

«پەرنەتاقتانى اپتا بويى سول كىتاپحانانىڭ قىزمەتكەرى قولداندى. ول ەشبىر نۇسقاۋسىز، بىردەن كادەسىنە جاراتتى. ياعني، برايل قارپىن بىلەتىن ادامدارعا ەش قيىندىق تۋدىرمايدى»، - دەدى جاننۇر ءايىپ.

كەيىن قولدانۋشى نە جازعانىن سەزە الاتىن ديسپلەي جاساۋ يدەياسىن پايدا بولدى. ەكى وقۋشى قازىر وسى باعىتتا جۇمىس ىستەپ ءجۇر. ايتا كەتەيىك، Expo Sciences Mexico حالىقارالىق وليمپياداسىنا الەمنىڭ 17 ەلىنەن بارلىعى 61 كوماندا قاتىستى. «كومپيۋتەر جانە روبوتوتەحنيكا» نوميناتسياسى بويىنشا جاننۇر مەن دانيار ەكىنشى ورىنعا يەلەندى.