ب ۇ ۇ تۇران جولبارىسىنىڭ پوپۋلياتسياسىن قالپىنا كەلتىرۋگە اتسالىسپاق

نۇر-سۇلتان. قازاقپارات - ق ر ەكولوگيا، گەولوگيا جانە تابيعي رەسۋرستار مينيسترلىگى بىرىككەن ۇلتتار ۇيىمىنىڭ دامۋ باعدارلاماسىمەن بىرلەسىپ ىلە-بالقاش ەكوجۇيەلەرىن قالپىنا كەلتىرۋگە ارنالعان جوبانى ىسكە قوستى، دەپ حابارلايدى قازاقپارات ءتىلشىسى.

بۇل تۋرالى ب ۇ ۇ- نىڭ دامۋ باعدارلاماسىنىڭ كوممۋنيكاتسيالار جونىندەگى كەڭسەسى اقپارات تاراتتى.

ون جىلعا (2021-2030 ج. ج.) مەجەلەنگەن باعدارلاما تۇران جولبارىسىنىڭ تاريحي مەكەنىندەگى ەكولوگيالىق جاعدايدى جاقسارتۋ ارقىلى سيرەك جانۋارلارعا تابيعي ورتا قالىپستىرۋدى كوزدەيدى.

«بۇل باستاما ب ۇ ۇ د ب مەن قازاقستان ۇكىمەتى اراسىنداعى كوپجىلدىق ىنتىماقتىستىق اياسىندا جۇزەگە اسىرىلادى. جوبا شەڭبەرىندە، ىلە وزەنى اتىرابىنىڭ جايىلما ورماندارىن قالپىنا كەلتىرۋ جانە «ىلە-بالقاش» مەملەكەتتىك تابيعي رەزەرۆاتىنىڭ اۋماعىندا تۇران جولبارىسىنىڭ رەينترودۋكتسياسىنا قاجەت جەمشوپ قورىن تۇراقتى قالىپتاستىرۋ جوسپارلانىپ وتىر. ءوڭىردىڭ بىرەگەي تابيعاتى مەن بيوالۋاندىعىن ساقتاۋ ماڭىزدى. وسى جونىندە حالىقتى كەڭىنەن قۇلاقتاندىرۋعا جانە جەرگىلىكتى تۇرعىنداردىڭ باستامالارىن قولداۋعا ەرەكشە نازار اۋدارىلادى»، - دەپ جازىلعان رەسمي مالىمەتتە.

ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريشتىڭ ايتۋىنا قاراعاندا، بىرەگەي ەكوجۇيەلەر مەن بيوالۋاندىقتى، فلورا مەن فاۋنانى قالپىنا كەلتىرۋ ءوڭىردىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋگە سەپتىگىن تيگىزەدى.

«قازاقستان. بيوالۋاندىقتىڭ ساقتالۋىنا كوپ كوڭىل بولەدى. سونىڭ اياسىندا ءتۇرلى ماقساتتى باعدارلامالار قولعا الىنعان. ءبىز تاڭداعان «جاسىل ەكونوميكاعا» ءوتۋ كونتسەپتسياسى ءتيىمدى باسقارۋ مەن تۇراقتى دامۋ قاعيدالارىنا ساي كەلەدى»، - دەيدى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى نۇرلان قىلىشبايەۆ.