اقىلى جولداردان تۇسكەن قارجى قايدا كەتىپ جاتىر - قازاۆتوجول جاۋابى
اتالعان ساۋالعا «قازاۆتوجول» ۇلتتىق كومپانياسىنىڭ اقىلى جولدار ديرەكسياسى ديرەكتورىنىڭ ورىنباسارى ساكەن ادىلبەكوۆ جاۋاپ بەردى، دەپ حابارلايدى قازاقپارات ءتىلشىسى.
«وتكەن جىلدىڭ قورىتىندىسى بويىنشا اقىلى جولداردان 8 ميلليارد تەڭگە توڭىرەگىندە قارجى ءتۇستى. تۇتىنۋشىلار تاراپىنان اقىلى جولدان تۇسكەن تابىس قايدا كەتىپ جاتىر؟ دەگەن ساۋال تۋىنداپ جاتادى. اقىلى جولداردان تۇسكەن اقى، سول جولداردى كۇتىپ باپتاۋ مەن ساپاسىن ارتتىرا تۇسۋگە جۇمسالادى. مىسالى، ءبىر اقىلى جول بەكەتىن الايىق. ول بەكەتتى فوتو جانە بەينەباقىلاۋ كامەراسىمەن قامتۋ، سونداي- اق بەكەتكە ەلەكتر جەلىسى مەن ينتەرنەت تارتۋ ماسەلەسى بار. ودان بولەك، بەكەت اۋماعىندا مەتەوستانسيا قويۋ ماسەلەسى قارالىپ جاتىر. ول دەگەنىمىز نە؟ وزدەرىڭىز بىلەسىزدەر، ەلىمىزدىڭ سولتۇستىك اۋماعىندا قىستىگۇنى ءبىر وبلىستىڭ وزىندە اۋا رايى ءارتۇرلى بولىپ جاتادى. ياعني اقمولا وبلىسىنىڭ ءبىر اۋدانىندا بوران بولسا، باسقا اۋداندا اياز سوعىپ تۇرادى. ءبىز بۇگىندە اۋا رايىن ءوزىمىز انىقتاپ، جەتكىزىپ وتىرامىز. الداعى ۋاقىتتا ول جۇمىس مەتەوستانسيانىڭ كومەگىمەن اۆتوماتتى تۇردە انىقتالاتىن بولادى»، - دەدى ساكەن ادىلبەكوۆ «قازاۆتوجول» ۇلتتىق كومپانياسى ۇيىمدىرعان باسپا ءسوز تۋرى بارىسىندا.
ونىڭ ايتۋىنشا، اقىلى جولداردان تۇسكەن قارجىنىڭ 80 پايىزى سول جولداردى دامىتا تۇسۋگە جۇمسالادى.
«وتكەن جىلدىڭ قاراشا ايىندا ەلىمىزدەگى اقىلى جولداردىڭ قاتارى تاعى 7 جول ۋچاسكەسىمەن تولىقتى. ارينە، جولدى اقىلى ەتكەننەن كەيىن، ونىڭ ساپاسى مەن ينفراقۇرىلىمى سوعان سايكەس بولۋى كەرەك. مىنە، اقىلى جولدان تۇسكەن قاراجات جول ساپاسىن ارتتىرۋعا جۇمسالىپ جاتىر. ارينە، جولدان تۇسكەن تابىس بويىنشا سالىق تولەنەدى. دەگەنمەن تۇسكەن قارجىنىڭ دەنى جولدى كۇتىپ- باپتاۋعا باعىتتالادى»، - دەيدى ول.
بۇعان دەيىن س. ادىلبەكوۆ ەلىمىزدەگى اقىلى جولداردىڭ ساپاسى مەن جول بويىنداعى ينفراقۇرىلىم دامي تۇسەتىنىن ايتقان بولاتىن.
اۆتور: ءالي يبرايەۆ
