پرەزيدەنت رەزيدەنتسياسى نە ءۇشىن بۇزىلادى؟

نۇر- سۇلتان. قازاقپارات - كەشە پرەزيدەنتتىڭ الماتىداعى رەزيدەنتسياسى سۇرىلەتىنى حابارلاندى. بۇعان نە سەبەپ؟ مەملەكەت باسشىسىنىڭ وسى شەشىمىن الماتىلىقتار قالاي قابىلدادى؟

قاڭتار وقيعاسى كەزىندە پرەزيدەنتتىڭ الماتىداعى رەزيدەنتسياسىنا دا شابۋىل جاسالعانىن بىلەمىز. قازىرگى كورىنىسى، مىنە، مىناداي....

وتكەنگە شەگىنىس جاساساق. بۇل عيمارات العاشقىدا برەجنيەۆ الاڭىنداعى لەنين مۇراجايىنىڭ كەشەنى رەتىندە سالىنا باستادى. ال 1986 -جىلى ەلدەگى ساياسي تولقۋلارعا بايلانىستى قۇرىلىسى توقتادى. ول كەزدە عيمارات 90 پروتسەنتكە دايىن ەدى. قۇرىلىس جۇمىستارى 1993 -جىلى قايتا جانداندى. ءسويتىپ عيماراتتىڭ اۋەل باستا ايتىلعانداي مۋزەي كەشەنى ەمەس، قازاقستان پرەزيدەنتىنىڭ رەزيدەنتسياسى بولاتىنى جاريالاندى. قۇرىلىسى 1995 -جىلى اياقتالدى. ال 1998-دە ەل استاناسى اقمولاعا كوشىرىلگەندە، بۇل عيمارات پرەزيدەنت رەزيدەنتسياسى مارتەبەسىن ساقتاپ قالدى.

2000 -جىلدىڭ قازانىندا رەزيدەنتسيا كەشەنى رەسپۋبليكالىق ماڭىزى بار ەسكەرتكىشتەر تىزىمىنە قوسىلدى. سودان بەرى عيمارات مەملەكەتتىك قورعاۋعا الىنعان. ال قاڭتاردا ورتەندى. وسىدان سوڭ مەملەكەت باسشىسى قاسىم- جومارت توقايەۆ نازاربايەۆ داڭعىلىندا اتشاپتىرىم اۋماقتى الىپ جاتقان رەزيدەنتسيانى ءسۇرۋ تۋرالى شەشىم قابىلدادى. مۇنى كەشە پرەزيدەنتتىڭ باسپا ءسوز حاتشىسى بەرىك ءۋالي حابارلادى. ەندى رەزيدەنتسيانىڭ ورنىنا قالا تۇرعىندارى ءۇشىن ساياباق سالىنادى.

الماتى اكىمدىگىنىڭ عيماراتى قاشان جوندەلەدى؟

بۇل دا ءبىر كەزدەرى پرەزيدەنت رەزيدەنتسياسى بولعان. 1980-جىلدارى سالىنعان عيماراتتا 1991-دەن 1994 -جىلعا دەيىن نۇرسۇلتان نازاربايەۆ وتىردى. ودان سوڭ الماتى قالاسى اكىمدىگىنىڭ عيماراتى بولدى. قاسىرەتتى قاڭتاردا قيراپ، ورتەنىپ، قۇر قابىرعاسى قالعان. تۇگەل جانىپ كەتكەن. مۇنداعى جۇمىستىڭ اۋقىمدىلىعى سونشا، ءالى كۇنگە دەيىن قۇرىلىس جۇمىستارى باستالماعان.

- ساپار سەيىلحان ۇلى، ەندى كورىپ تۇرعانىمىزداي، اكىمدىكتە قۇرىلىس جۇمىستارى باستالماعان ەكەن. وسى كەزگە دەيىن قانداي شارۋا اتقارىلدى؟

ساپار نۇراشيەۆ، الماتى قالاسى جايلى قالالىق ورتا باسقارماسىنىڭ باسشىسى:

- ەندى وزدەرىڭىز بىلەتىندەي، قاڭتاردىڭ 5 مەن التىسى الماتى قالاسى اكىمشىلىگىنىڭ عيماراتى وتقا ورانىپ جاتتى. ەكى كۇن بويى. تەمپەراتۋرالىق اسەرى بولعاننان كەيىن بۇل ترەك قۇرىلعىلار قانداي جاعدايدا تۇرعانىن ەشكىم بىلگەن جوق. سوندىقتان ءبىز قاز نيسا ا ق- قا تاپسىرىس بەرىپ، وسى ترەك قۇرىلعىلارىن تولىقتاي زەرتتەپ شىقتى. ول مەكەمەمە بىزگە قورىتىندىسىن بەردى. ترەك قۇرىلىمداردىڭ باسىم بولىگى تۇراقتى دەپ تابىلدى. سمەتالىق قۇجاتتارىمىز وسى ناۋرىز ايدىڭ 20-25 مەملەكەتتىك ساراپتامادان ءوتىپ، وڭ قورىتىندىنى الادى دەپ جوسپارلاپ وتىرمىز. وعان دەيىن ءبىز ەندى توسپاي عيماراتتىڭ ءىشىن سىرتىن تازارتۋ جۇمىستارىن جۇرگىزدىك.

- جالپى بولجاممەن الماتى قالاسىن قاشان تولىق قالپىنا كەلتىرەسىزدەر؟

ساپار نۇراشيەۆ، الماتى قالاسى جايلى قالالىق ورتا باسقارماسىنىڭ باسشىسى:

- ءبىزدىڭ جوسپار بويىنشا ەندى ۇزاق قۇرىلىس جۇرگىزىلەتىن عيمارات - ول وسى الماتى قالاسى اكىمشىلىگى. جانە دە جەلتوقسان كوشەسىندە تۇرعان «حابار» مەن «قازاقستان» ارنالارىنىڭ عيماراتتارى. بۇل عيماراتتار بويىنشا جۇمىستار وسى جىلدىڭ سوڭىنا دەيىن جۇرەدى دەپ جوسپارلاپ وتىرمىز. قالعان نىساندار بويىنشا جۇمىستار 2-3 ايدا تولىق اياقتالادى دەگەن سەنىمدەمىز.

كوپ جەردە بيزنەس نىساندارى تونالىپ، عيماراتتار وتقا وراندى. قالاداعى ءبىرقاتار نىساندى بيزنەس وكىلدەرى جوندەپ بەرەمىز دەپتى. ال اكىمدىك «حابار» مەن «قازاقستان» ارنالارىنىڭ فيليالدارى ورنالاسقان نىسان، قالالىق پوليتسيا دەپارتامەنتى مەن اۋداندىق پوليتسيا باسقارمالارىنىڭ عيماراتتارى سىندى مەملەكەتتىك مەكەمەلەرگە قارجى بيۋدجەتتەن بولىنەدى. ءبىراق شىعىن كولەمى ءالى ناقتىلانباعان. ءبىر انىعى، بيىلدان ۇزاماي قالا تولىق قالپىنا كەلتىرىلمەك. اكىمدىك وكىلىنىڭ سوزىنەن وسىنى ۇقتىق. ال الماتىنىڭ قازىرگى كورىنىسى وسىنداي. جۇرت قالىپتى تىرشىلىگىنە ورالعان.

www.24.kz