16:01, 03 - ناۋرىز 2022 | GMT +5
ەلگە تانىمال ايتىسكەر اقىن ءماجىلىس دەپۋتاتى بولدى
نۇر- سۇلتان. قازاقپارات - بۇگىن ساياسي كەڭەس بيۋروسىنىڭ قاۋلىسىمەن «AMANAT» پارتياسىنان پارلامەنت ءماجىلىسى دەپۋتاتىنىڭ بوس مانداتىن پارتيالىق ءتىزىم بويىنشا امانجول ءالتايعا بەرۋ تۋرالى شەشىم قابىلداندى.
بۇل تۋرالى «AMANAT» پارتياسىنىڭ اتقارۋشى حاتشىسى اسحات ورالوۆ جەلىدە جازدى. ءتيىستى شەشىم ق ر ورتالىق سايلاۋ كوميسسياسىنا جىبەرىلگەن.
«امانجول ءالتايدى كوپتەن بەرى تانيمىن. تەك ەلگە تانىمال ايتىسكەر اقىن عانا ەمەس، حالىق مۇددەسى ءۇشىن اركەز ساليقالى ءسوز ءتۇزىپ جۇرگەن ازامات رەتىندە دە جاقسى بىلەمىن. ءارقاشان ەلدىڭ جانىنان تابىلىپ، قيىن كەزدە دە پارتيامەن بىرگە بولا بىلگەن، ءىزىن باسىپ كەلە جاتقان جاستارعا ىسىمەن دە، سوزىمەن دە ۇلگى بولىپ جۇرگەن تۇلعا. الدا ءالى تالاي ماقساتتار تۇر. ورتاق مۇددە ءۇشىن ناتيجەلى جۇمىس ىستەيمىز دەپ سەنەمىن»، - دەدى اسحات ورالوۆ.
