ەلىمىزدە قانشا اۋىلدا ينتەرنەت جوق
ۇلتتىق كوممۋنيكاتسيالار جانە سيفرلاندىرۋ قاۋىمداستىعىنىڭ ۆيتسە- پرەزيدەنتى جانات اسانتايەۆا وسىلاي دەيدى، دەپ حابارلايدى قازاقپارات ءتىلشىسى.
«رەيتينگتەرگە قاراماستان قازاقستان حالقى ساپالى ءارى جىلدامدىعى جوعارى ينتەرنەتكە قول جەتكىزۋدە قيىندىقتارعا تاپ بولىپ وتىر. ءتىپتى كەي جەرلەردە ونى قولدانۋ مۇمكىندىگى دە جوق. مەملەكەتتىك ورگانداردىڭ مالىمەتىنە قاراعاندا 2020 -جىلى تالشىقتى- وپتيكالىق بايلانىس پەن ينتەرنەتكە موبيلدى قولجەتىمدىلىكتى قامتاماسىز ەتەتىن جەلى قۇرىلىسىن سالۋ جوباسى اياقتالىپ، 5532 ەلدى مەكەن قامتىلدى. حالىقارالىق تاجىريبەنى ەسكەرە وتىرىپ، بۇعان دەيىن قولدانىستا بولعان «سيفرلى قازاقستان» مەملەكەتتىك باعدارلاماسى اياسىندا تالشىقتى- وپتيكالىق بايلانىس جەلىسى ەڭ ءىرى ەلدى مەكەندەرگە جەتكىزىلدى. ەلدى مەكەندەردە اۆتونەنتتەرگە دەيىن بايلانىس جەتكىزۋ موبيلدى تەحنولوگيالار ارقىلى جۇزەگە اسىرىلادى»، - دەدى ول تەلەكوممۋنيكاتسيا نارىعىن دەمونوپوليزاتسيالاۋ ماسەلەلەرىن تالقىلاۋعا ارنالعان Menmedia.kz كروسس-مەدياپلاتفورماسى بارىسىندا.
ونىڭ اتاپ وتۋىنشە، ءاربىر وپەراتور تەحنيكالىق مۇمكىنشىلىكتەرگە قاراي موبيلدى تەحنولوگيالاردى وزدەرى تاڭدايدى.
«وتكەن جىلدىڭ قاراسىندا ءماجىلىس دەپۋتاتتارى بيزنەستىڭ ەلەكتروندى ەسەپ بەرۋگە تولىق كوشۋىن كوزدەيتىن جاڭا رەتتەۋشىلىك ساياساتقا قاتىستى ماسەلە كوتەردى. ءبىراق، 1178 اۋىلدا ينتەرنەتتىڭ جوق ەكەندىگىن انىقتالىپ وتىر. مۇنىڭ ۇستىندە اۋىل تۇرماق قالالاردىڭ وزىندە كەي جەرلەردە بايلانىس ءالسىز. ادامدار كوپ جينالاتىن جەردە دە جۇكتەمەنىڭ ارتۋىنا وراي بايلانىس تۇراقتى ەمەس. دەپۋتاتتاردىڭ پايىمىنشا، ەلەكتروندى ەسەپ بەرۋدى مىندەتتەيتىن نورما قابىلدانعان جاعدايدا ەلىمىز بويىنشا مىڭداعان كاسىپكەر قيىندىققا تاپ بولار ەدى»، - دەدى ول.
اۆتور: مارلان جيەمباي
