شىمكەنت دارىگەرلەرى كوروناۆيرۋسپەن اۋىرعان سوڭعى ناۋقاستى ۇيىنە شىعارىپ سالدى - ۆيدەو

شىمكەنت. قازاقپارات- شىمكەنتتە ينفەكسيالىق ستاتسيونارداعى دارىگەرلەر سوڭعى ناۋقاستى ۇيىنە شىعارىپ سالدى، دەپ حابارلايدى قازاقپارات ءتىلشىسى.

كوروناۆيرۋس ىندەتىن جەڭىپ شىققان 70 جاستاعى قاريا ينفەكسيالىق ستاتسيوناردان شىعاردا دارىگەرلەر ۇلكەن قوشەمەت كورسەتتى. اۋرۋىنان قۇلان تازا ايىققان تۇرعىن دا دارىگەرلەرگە ريزاشىلىعىن ءبىلدىرىپ، العىسىن ايتتى.

بيسەنبەك وسەربايەۆ ورتالىقتا ەم الىپ شىققان سوڭعى ناۋقاس. ەگدە جاستاعى قارت كىسىنىڭ قاۋىپتى ينفەكسيانى جەڭىپ شىعۋى دارىگەرلەر ءۇشىن جەتىستىك، قاۋىپتى ينفەكسيانى جەڭۋدە جەمىستى جەڭىس.

ايتا كەتەيىك، قالاداعى ەپيداحۋال ۋشىققاندا «اقجايىق» شاعىناۋدانىندا مودۋلدى جۇقپالى اۋرۋلار گوسپيتالى اشىلعان بولاتىن. ەمدەۋ مەكەمەسىندە دارىگەرلەر كوروناۆيرۋسقا شالدىققان اۋىر جاعدايداعى ناۋقاستاردى قابىلداپ، كۇشەيتىلگەن رەجيمدە جۇمىس ىستەدى. 200 ورىنعا لايىقتالعان ستاتسيونار 2020 -جىلدىڭ 10-ماۋسىم كۇنى اشىلىپ، 2022 -جىلدىڭ 28-اقپان كۇنى سوڭعى ناۋقاستى ۇيىنە شىعاردى. مۇندا سوڭعى ەكى جىلدىڭ ىشىندە ون مىڭعا جۋىق ناۋقاس ەم الىپ شىققان.

اۆتور: قايرات زاينيشەۆ