ناتو ەۋروپاداعى اسكەري الەۋەتىن كۇشەيتىپ جاتىر

نۇر-سۇلتان.قازاقپارات - فرانتسيا ەۋروپانىڭ شىعىسىنداعى ناتو كۇشتەرىنە اسكەري تەحنيكانى جىبەرە باستادى. كەشە بەسىنشى رەسپۋبليكانىڭ وڭتۇستىگىندەگى يستر قالاسىنداعى اۋە بازاسىنان رۋمىنياعا قاراي ءتۇرلى تەحنيكانى تيەگەن ۇشاق ۇشىپ شىقتى.

بۇل ەلدە فرانسيانىڭ 500 ساربازى ورنالاسقان. ال فرانسيا پرەزيدەنتى ەممانۋل ماكرون ۋكرايناداعى جاعدايعا بايلانىستى تاعى حالىققا ۇندەۋ جولداپ، قاقتىعىستى توقتاتۋ ءۇشىن رەسەي تاراپىمەن ديالوگتى جالعاستىرا بەرەتىنىن جەتكىزدى.

ەممانۋەل ماكرون، فرانسيا پرەزيدەنتى:

- ءبىز ناتو شەڭبەرىندە ەۋروپالىق ەلدەردىڭ قاۋىپسىزدىگى مەن ەگەمەندىگىن قورعاۋ ماقساتىندا اليانستىڭ ايماقتاعى كۇشتەرىن كۇشەيتىپ جاتىرمىز. كەشە رۋمىنياعا جۇزدەگەن جاۋىنگەر اتتاندى. ءبىراق ۋكرايناداعى اسكەري قيمىلداردى توقتاتۋ ءۇشىن ديپلوماتياعا كۇش سالىپ، سانكتسيالار ارقىلى رەسەي باسشىلىعىنا ساياسي جانە ەكونوميكالىق تۇرعىدان ىقپال ەتۋدى جالعاستىرا بەرەمىز.

ال ا ق ش گەرمانياعا تاعى 3800 جاۋىنگەرىن اتتاندىردى. دجوردجيا شتاتىنداعى 3- جاياۋ اسكەر ديۆيزياسىنىڭ ساربازدارى ناتو شەڭبەرىندە جاتتىعىپ، اليانستىڭ شىعىس قاپتالىن كۇشەيتەتىن بولادى. ءبىراق ناتو ۋكرايناعا اسكەرىن جىبەرمەيتىنىن ايتىپ وتىر. ال ا ق ش مەملەكەتتىك حاتشىسى ەگەر رەسەي ۋكراينادان اسكەرىن شىعارسا كەلىسسوز جۇرگىزۋگە دايىن ەكەنىن ايتىپ وتىر.

ەنتوني بلينكەن، ا ق ش مەملەكەتتىك حاتشىسى:

- ءبىزدىڭ ەكونوميكالىق سانكتسيالار رەسەي ۇكىمەتىن توقتاتۋعا، كۇشتەپ كوندىرۋگە باعىتتالعان. ا ق ش ديپلوماتيالىق امالدارعا دا كۇش سالىپ جاتىر. ءبىز ديالوگ ءۇشىن ەسىگىمىزدى اشىق ۇستايمىز. ءبىراق اسكەري قاقتىعىستان باس تارتپاي، مامىلەگە كەلۋ مۇمكىن ەمەس.

www.24.kz