قازاقستاندا سپورت تورەشىلەرىنىڭ جالاقىسىنا باعا بەلگىلەۋ كوتەرىلمەك
بۇل تۋرالى ق ر مادەنيەت جانە سپورت ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
داۋرەن ابايەۆ مينيسترلىكتىڭ كەڭەيتىلگەن القا وتىرىسىندا «دەنە تاربيەسى جانە سپورت تۋرالى» زاڭعا سايكەس، سپورت فەدەراتسيالارى بارلىق ساناتتاعى سپورت تورەشىلەرىن دايىنداۋدى جۇزەگە اسىرۋعا مىندەتتى ەكەندىگىن ايتتى.
«بۇگىندە ەلىمىزدە 4276 تورەشى بار. ونىڭ 413 ءى حالىقارالىق ساناتقا يە جانە تەك 12 تورەشى عانا توكيوداعى وليمپيادا ويىندارىنا تورەلىك جاساۋعا جۇمىلدىرىلعان. بۇل فاكتى اتالعان باعىتتاعى جۇمىستىڭ ءالسىز ەكەندىگىن كورسەتەدى»، - دەدى مينيستر.
ونىڭ اتاپ وتۋىنشە، فەدەراتسيالاردىڭ تورەشىلەردى دايىنداۋعا مۇددەلىك تانىتپاۋىنا جالاقىنىڭ تومەن ءبولۋى سەبەپ بولىپ تۇر.
«شۋچەدە دە ايتتىم، سپورتتىق جارىستىڭ ءبىر كۇنىنە قىزمەت كورسەتكەنى ءۇشىن تورەشىگە 1239 تەڭگەدەن باستاپ تولەنەدى. وسىعان وراي سپورتتىق تورەشىلەردىڭ جالاقىسىنا باعا بەلگىلەۋدى كوتەرۋ ۇسىنىسىن ازىرلەيمىز. بۇل ءىس جۇزىندە ۆولونتەرلىك، اقى تولەنبەيتىن جۇمىس بولىپ تۇر. سوندىقتان وسى جۇيەنى جولعا قويۋ كەرەك»، - دەدى داۋرەن ابايەۆ.
