قازاقستاندىق جۇك كولىكتەرىن ۋكراينا اۋماعىنان شىعارۋ قالاي ءجۇرىپ جاتىر

نۇر-سۇلتان. قازاقپارات - ق ر يندۋستريا جانە ينفراقۇرىلىمدىق دامۋ مينيسترلىگىندە حالىقارالىق جۇك تاسىمالى ماسەلەلەرى بويىنشا جەدەل كەڭەس ءوتتى، دەپ حابارلايدى قازاقپارات.

جيىنعا حالىقارالىق اۆتوموبيل تاسىمالداۋشىلارى وداعى (قازاتو)، «اتامەكەن» ۇلتتىق كاسىپكەرلەر پالاتاسى، KazLogistics وكىلدەرى، سونداي-اق وتاندىق تاسىمالداۋشى (ولارعا ۋكراينا اۋماعىندا قالىپ قويعان اۆتوموبيلدەردىڭ باسىم بولىگى تيەسىلى) قاتىستى.

«جينالىس بارىسىندا جۇك تاسىمالداۋشىلار مەن جۇك اۆتوموبيلدەرىنىڭ جۇرگىزۋشىلەرىنە كومەك كورسەتۋ بويىنشا قابىلدانىپ جاتقان جانە الداعى ۋاقىتقا جوسپارلانعان شارالار تالقىلاندى»، - دەدى مينيسترلىكتەن.

بۇعان دەيىن حابارلاعانداي، ۋكرايناداعى وقيعالاردىڭ باستالۋىنا دەيىن اتالمىش ەل اۋماعىندا 50 گە جۋىق قازاقستاندىق جۇك اۆتوكولىك قۇرالى بولعان ەدى. ولاردى ەل اۋماعىنان شىعارۋ ءۇشىن تاسىمالداۋشىلاردىڭ ءتىزىمى جاسالدى. اتالعان ءتىزىم ق ر سىرتقى ىستەر مينيسترلىگىنە بەرىلدى.

«سونداي-اق ق ر ي ي د م پولشا مەن مولدوۆانىڭ مەملەكەتتىك ورگاندارىنا ماشينالار مەن جۇرگىزۋشىلەردەن قوسىمشا قۇجاتتاردى تالاپ ەتپەي، رۇقسات قۇجاتىن بەرۋ بويىنشا جۇگىندى.

ايتا كەتكەن ءجون، 28- اقپان كۇنى ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ قازاقستاندىق تاسىمالداۋشىلاردىڭ ۋكراينادان شىعۋى ءۇشىن «جاسىل ءدالىز» ۇيىمداستىرۋ جونىندە ۋاكىلەتتى ورگاندارمەن كەلىسسوزدەر جۇرگىزگەن بولاتىن.

ناتيجەسىندە بۇگىنگى تاڭدا 3 قازاقستاندىق جۇك كولىگى «روۆارۋسسكايا» وتكىزۋ پۋنكتى ارقىلى ۋكراينا- پولشا شەكاراسىن كەسىپ ءوتتى.

قازىرگى ۋاقىتتا تاعى 8 كولىك ۋكراينا-مولدوۆا شەكاراسىنان «ستاروكوزاچە-تۋدورا» وتكىزۋ پۋنكتى ارقىلى وتەدى. قالعان قازاقستاندىق جۇك اۆتوموبيلدەرىن شىعارۋ بويىنشا جۇمىس جالعاساتىن بولادى»، - دەپ ناقتىلادى ۆەدومستۆودان.

ءمالىم ەتىلگەندەي، كەڭەس بارىسىندا تاسىمالداۋشىلارعا ءبىرقاتار ۇسىنىس جاسالدى.

اتاپ ايتساق: - جۇرگىزۋشىلەردى ۋكراينانىڭ باتىس بولىگى ارقىلى پولشا مەن مولدوۆا شەكارالارىنا باعىتتاۋ (ەلدىڭ اتالعان اۋماعىندا جاعداي تۇراقتى جانە وتكىزۋ پۋنكتتەرى اشىق)؛

- كولىك قۇرالدارى كيەۆ پەن كيەۆ وبلىسىنا جاقىن جەردە بولعان جاعدايدا ولاردى جاعداي تۇراقتالعانعا دەيىن قويمالار، كوپىرلەر مەن باسقا دا قۇرىلىستاردان قاۋىپسىز قاشىقتىققا جىلجىتىپ، ورنالاستىرۋ. سونىمەن قاتار تاسىمالداۋشىلاردىڭ نازارىنا بەلارۋس شەكاراسى ارقىلى «جاسىل ءدالىز» اشۋ ماسەلەسىنىڭ پىسىقتالىپ جاتقانى تۋرالى اقپارات جەتكىزىلدى.