ساتىبالدى داۋلەتالين: ارزان ەڭبەك ەكونوميكامىزدى قۇرتىپ جاتىر
«ارزان ەڭبەك ەكونوميكانى قۇرتىپ جاتقانىن اشىق ايتۋ كەرەك. وتباسىن اسىراۋ ءۇشىن جۇمىس كۇنىن ءتيىمسىز ورىندا بوسقا وتكىزىپ جۇرگەندەر كوپ. لايىقتى ەڭبەك ارزان بولا المايتىنىن ءبارىمىز تۇسىنەتىن كەز جەتتى. ەڭبەك لايىقتى باعالانباسا، جوقشىلىق اۋەلى ادام ساناسىندا ورنايدى. سالدارىنان الەۋمەتتىك-ەكونوميكالىق تۇرعىدان قورعالماعانىن اڭداعان ادامدار ءوز قۇقىقتارى مەن مۇددەسىن قورعاۋ ءۇشىن ەڭ شەتىن شارالارعا بارۋى مۇمكىن»، - دەدى ول ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىندە.
سونداي-اق ول جۇمىسشى مەن جۇمىس بەرۋشىنىڭ اراسىنداعى داۋدى ەرەۋىلمەن ەمەس، ەرەجەمەن شەشەتىندەي جۇيە قۇرۋ كەرەك دەگەن پىكىر ايتتى.
«بۇگىندە جۇمىسشىلارعا تابىستىڭ ءوسىمى جانە جۇمىس بەرۋشىمەن اراداعى قاتىناستى قۇقىقتىق الاڭدا شەشۋ مۇمكىندىگى قاجەت. قازىر مەملەكەتكە دە، كاسىپوداق قوزعالىستارىنا دا وركەنيەتتى ەڭبەك نارىعىن قۇرۋ ماڭىزدى»، - دەدى فەدەراتسيا باسشىسى.
