كاسىپورىندار قىمبات تەحنولوگيادان ارزان جۇمىس كۇشىن ءتيىمدى كورەدى - كاسىپوداق فەدەراتسياسى
«ءبىزدىڭ زاڭنامادا ەڭبەك قۇقىعىن قامتاماسىز ەتۋگە قاجەتتى قۇقىقتىق ارسەنالدار جەتكىلىكتى. ءبىراق ءىس جۇزىندە ەڭبەك قۇقىعىنىڭ بەلگىلەنگەن كەپىلدىكتەرى مەن ولاردى ىسكە اسىرۋ مۇمكىندىكتەرىنىڭ اراسىندا الشاقتىق بار ەكەنىن كورىپ ءجۇرمىز. وعان جىل سايىن كاسىپوداق ۇيىمدارىنا ەڭبەك قۇقىقتارىنىڭ بۇزىلعانى تۋرالى جۇمىسشىلاردان كەلىپ جاتاتىن ارىز-شاعىمدار كۋا. ەلىمىزدە جالدامالى جۇمىسشىلاردىڭ ەڭبەك قۇقىقتارىن ساقتاۋ مەن قورعاۋدىڭ كوپتەگەن سىن-تەگەۋرىندەرى بار»، - دەدى فەدەراتسيا باسشىسى.
ونىڭ بايقاۋىنشا، جۇمىس بەرۋشىلەر جالدامالى ەڭبەككە كەتەتىن شىعىندى ۇنەمدەۋ ءۇشىن ەڭبەك زاڭناماسىنداعى نورمالاردان ءجيى اۋىتقيتىن كورىنەدى.
«ەڭبەكاقىنىڭ ستاگناتسياسى مەن ەڭبەك تابىسىنىڭ تومەندەۋى حالىقتىڭ ەرتەڭگى كۇنگە دەگەن سەنىمىن ازايتىپ جاتىر. ويتكەنى كۇردەلى ەكونوميكالىق جاعدايلاردا جۇمىس بەرۋشىلەردىڭ كوبى ەڭبەك سالاسىنداعى وزگەرىستەرگە دايىن بولماي شىقتى. جۇمىس بەرۋشىلەر جالدامالى ەڭبەككە كەتەتىن شىعىندى ۇنەمدەۋ ءۇشىن ەڭبەك زاڭناماسىنداعى نورمالاردان ءجيى اۋىتقيدى. كەيدە بۇل قۇقىق سالاسىنداعى بىلىكسىزدىكتەن دە تۋىنداپ جاتادى. قالاي بولعاندا دا بۇل جۇمىسشىلاردىڭ مۇددەسىنە زيان كەلتىرەدى. جۇمىسشىلار ەڭبەك قاتىناسىنداعى بارىنشا از قورعالعان تاراپ بولىپ وتىر. كومپانيالار بيزنەسىن دامىتۋ ءۇشىن تەنولوگيالاردى اۋىستىرۋ ارقىلى ەڭبەك ونىمدىلىگىن ارتتىرۋدىڭ ورنىنا ارزان ەڭبەككە ارقا سۇيەۋگە بەيىم. قاراپايىم تىلمەن ايتقاندا، جاڭا قوندىرعىلار الىپ، قوماقتى كاپيتال سالعىسى كەلمەيدى. ودان دا ارزان جۇمىس كۇشىن پايدالانۋدى دۇرىس دەپ سانايدى»، - دەدى ساتىبالدى داۋلەتالين.
