قازاقستاندىقتاردىڭ بيلىك ينستيتۋتتارىنا دەگەن سەنىمى قانداي

نۇر-سۇلتان. قازاقپارات - قازاقستان حالقىنىڭ بيلىككە دەگەن سەنىم دەڭگەيىن انىقتاۋ ماقساتىندا ەل اۋماعىندا مونيتورينگ جاسالىپ، ساۋالناما جۇرگىزىلدى، دەپ حابارلايدى قازاقپارات ءتىلشىسى.

«حالىقتىڭ بيلىك ينستيتۋتتارىنا دەگەن سەنىمى وزگەرىسسىز قالىپ وتىر. ەلدەگى بارلىق دەڭگەيلى بيلىكتىڭ ۆەرتيكالى بويىنشا حالىقتىڭ باسىم بولىگى، ياعني 81,4 پايىزى مەملەكەت باسشىسىنا سەنىم ارتىپ وتىر. وسى تۇستا ايتىپ وتكەن ءجون، وتكەن جىلدىڭ قاراشا ايىنان باستاپ، بارلىق بيلىك ينستيتۋتتارىنا دەگەن حالىقتىڭ سەنىمى ازايعان. اتاپ ايتقاندا، ۇكىمەتكە 18 پايىزعا، پارلامەنتكە 15 پايىزعا جانە وبلىس اكىمدەرىنە 13 پايىزعا دەيىن سەنىم تومەندەگەن. سونىمەن قاتار حالىقتىڭ ەلدىمەكەندەر اكىمدەرىنە دەگەن سەنىمى 5,7 پايىزعا، ءماسليحاتتارعا 15 پايىزعا جانە ساياسي پارتيالارعا 14,6 پايىزعا تومەندەگەن»، - دەدى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى الۋا جولدىبالينا مونيتورينگ ناتيجەسىمەن تانىستىرا وتىرىپ.

ينستيتۋت باسشىسى ورىنباسارىنىڭ مالىمەتىنشە، ساۋالناماعا قاتىسقان ازاماتتاردىڭ 43,7 پايىزى ساياسي پارتيالاردىڭ قىزمەتىنە سەنىپ، وڭ باعا بەرەدى.

«ساۋالناما كەزىندە رەسپوندەنتتەرگە جاڭا پارتيالارعا قاتىستى سۇراق قويىلدى. سونىڭ اياسىندا رەسپوندەنتتەردىڭ 48,4 پايىزى جاڭا ساياسي پارتيانى قولداۋعا دايىن ەكەنىن جەتكىزدى. ال ساۋالناماعا قاتىسقان ءاربىر ءۇشىنشى ازامات جاڭا پارتيانى قولداۋعا دايىن ەمەس ەكەندىگىن العا تارتتى. جانە قاتىسۋشىلاردىڭ 15,8 پايىزى اتالعان سۇراققا جاۋاپ بەرۋگە قينالاتىندىعىن ايتتى»، - دەيدى ول.

بۇعان دەيىن الۋا جولدىبالينا «قازاقستاندىقتار «حالىق ۇنىنە قۇلاق اساتىن مەملەكەت» قاعيداتىنا سەنە مە؟» دەگەن ساۋالعا قاتىستى پىكىر ءبىلدىردى.