عازيز ابىشيەۆ: پرەزيدەنت پارتيانى ۇجىمدىق باسقارۋعا تاپسىرۋى مۇمكىن
«پرەزيدەنتتىڭ پارتيا باسشىلىعىنان كەتەتىنى تۋرالى اڭگىمە ونىڭ ورنىنا ءتوراعالىققا باسقا ادام كەلەدى دەگەندى بىلدىرمەۋى مۇمكىن. مەملەكەت باسشىسى پارتيانى ۇجىمدىق باسقارۋعا تاپسىرادى دەگەن نۇسقا بار. ياعني، پارتيا باسشىلىعى كوشباسشى تۇلعادان ۇجىمدىق تيپكە اۋىسادى. مۇمكىن، جالعىز ءتوراعانىڭ ورنىنا حاتشىلىق قۇرام نەمەسە ساياسي بيۋرو باسقارۋى مۇمكىن. بۇل پارتيانى بۇرىنعىداي ادامنىڭ توڭىرەگىنە ەمەس، يدەيانىڭ توپتاساتىن يدەولوگياسى مىعىم ينستيتۋتسيونالدى كۇشكە اينالدىرادى»، - دەدى ساياسي شولۋشى.
ساراپشىنىڭ ايتۋىنشا، مۇنداي ءتاسىل پارتيا مەن ساياسي جۇيەنى تۇراقتى ەتەدى.
«ءبىز ءبىر شەكتەن ەكىنشى شەككە ۇمتىلا بەرەمىز. پارتيا ەلدىڭ سەنىمى ءۇشىن كۇرەس جۇرگىزۋى كەرەك. ول ءۇشىن ماجوريتارلىق جۇيەگە ورالۋ قاجەت. ادامدار ءوز داۋىسى ءۇشىن كۇرەسىپ، داۋىس بەرۋشىلەرمەن تىكەلەي بايلانىسقا ءتۇسۋى كەرەك»، - دەپ تولىقتىردى عازيز ابىشيەۆ.
اۆتور: ەسىمجان ناقتىباي
