قاي ءوڭىر تۇرعىندارىنىڭ قارىزى كوپ – ساۋالناما
«ءوز ءوڭىرىنىڭ ءارتۇرلى اسپەكتىلەرىمەن قاناعاتتانباۋشىلىق كوبىنەسە تابىسى تومەن نەمەسە ورتا دەڭگەيدەن ءسال تومەن تۇرعىندارعا ءتان. ساۋالناماعا قاتىسۋشىلاردىڭ باسىم بولىگى، ناقتى ايتقاندا 55 پايىزدان استامى الەۋمەتتىك ماڭىزى بار 19 ءتۇرلى ازىق- تۇلىك باعاسىنىڭ وسكەنىن ايتتى. ەڭ قاتتى قىمباتتاعان تاۋارلار اراسىندا سيىر ەتى، ۇن، تاۋىق ەتى، نان مەن كۇنباعىس مايى بار. ازىق- تۇلىك باعاسىنىڭ قىمباتتاۋىنا الاڭداۋشىلىق تانىتقاندار سولتۇستىك قازاقستان، قاراعاندى وبلىستارى جانە شىمكەنت قالاسىنىڭ تۇرعىندارى»، - دەدى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى الەۋمەتتىك زەرتتەۋلەر ءبولىمىنىڭ باسشىسى جاننا كارىموۆا الەۋمەتتىك مونيتورينگ ناتيجەسىن تانىستىرا وتىرىپ.
سپيكەردىڭ مالىمەتىنشە، حالىقتىڭ تابىسى از بولىگى، ءوز كىرىسىن ارتتىرۋعا دايىن ەكەنىن جەتكىزگەن.
«ساۋالناما ناتيجەلەرى بويىنشا ءاربىر ءۇشىنشى قازاقستاندىقتىڭ، ناقتىراق ايتقاندا 29,8 پايىزىنىڭ جيناعان قارجىسى جوق. دەگەنمەن ءوز قارجىسى بار. سوڭعى 9 ايدىڭ ىشىندە بۇل كورسەتكىش شامالى ارتقان. وتكەن جىلدىڭ ماۋسىمىندا بۇل كورسەتكىش 24,5 پايىزدى قۇراسا، قاراشا ايىندا 27 پايىزعا ارتقان. ال بيىل اقپاندا 29,8 پايىزعا تەڭ. قارىزى بار حالىقتىڭ ۇلەسىنە كەلسەك، ولار كوبىنەسە 3 نەمەسە 4 بالاسى بار رەسپوندەنتتەر. سونىمەن قاتار تابىسى تومەن نەمەسە ورتاشا دەڭگەيدەن ءسال تومەن ادامدار. وڭىرلەر بويىنشا قارجى جيناعى جوق بولا تۇرا، قارىزى باسىم رەسپوندەنتتەردىڭ ۇلەسى ماڭعىستاۋ، قىزىلوردا جانە اقمولا وبلىستارىنا ءتان»، - دەيدى ول.
ەلىمىزدە حالىقتىڭ الەۋمەتتىك جاعدايىنا مونيتورينگ جاسالعانىن بۇعان دەيىن حابارلاعان بولاتىنبىز. ساۋالنامانى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى وتكىزدى. وعان 18 جاسقا تولعان، بارلىعى 6800 رەسپوندەنت قاتىستى. سونداي- اق «قازاقستان حالقى وزدەرىنىڭ الەۋمەتتىك جاعدايىنا قانشالىقتى قاناعاتتانادى؟»، «قاي ءوڭىر تۇرعىندارى ازىق- تۇلىك پەن باسقا تاۋارلاردىڭ باعاسىنا قاناعاتتانبايدى؟» دەگەن سۇراقتارعا جاۋاپ بەرىلدى.
اۆتور: ءالي يبرايەۆ
