قاڭتار وقيعاسىنان كەيىن ۇستالعانداردى ازاپتاعان پوليتسەيلەر جاۋاپقا تارتىلادى - ەرلان قوشانوۆ

نۇر- سۇلتان. قازاقپارات - ازاپتاۋلارعا قاتىستى زاڭسىز ارەكەت جاساعان پوليتسەيلەر جاۋاپقا تارتىلادى. بۇل تۋرالى ءماجىلىس ءتوراعاسى ەرلان قوشانوۆ ءمالىم ەتتى، دەپ حابارلايدى قازاقپارات ءتىلشىسى.

«قاڭتار وقيعاسىنان كەيىن پوليتسيا تاراپىنان بولعان ازاپتاۋلارعا قاتىستى بۇرىنعى ىشكى ىستەر ءمينيسترىن جاۋاپكەرشىلىككە تارتۋ كەرەك دەپ سانايسىز با» دەگەن سۇراق قويدى.

«ەگەر ادام قىلمىستىق ىسكە تارتىلىپ جاتسا، ازاپتاۋعا قاتىستى كۇمان بولسا، ونى بۇرىنعى مينيستر تۇرعىمبايەۆ ءوزى بارىپ ازاپتاعان جوق قوي. بىرىنشىدەن، ونداي بۇيرىقتى بەرگەن جوق. زاڭسىز ءىس- ارەكەت جاساعان پوليتسەيلەر بولسا، ولار جاۋاپقا تارتىلادى. سوتتا دالەلدەنسە، ولاردىڭ بارلىعى ءتيىستى جازاسىن الادى»، - دەدى ە. قوشانوۆ.

سونىمەن قاتار ءماجىلىس ءتوراعاسىنان قاڭتار وقيعاسىنا قاتىستى پارلامەنتتىك تىڭداۋ نە سەبەپتى وتكىزىلمەگەنى سۇرالدى.

«قازىرگى كەزدە تەرگەۋ امالدارى ءجۇرىپ جاتىر. تەرگەۋ اياقتالماي جاتىپ ءبىز قانداي پارلامەنتتىك تىڭداۋ وتكىزە الامىز؟»، - دەدى ەرلان قوشانوۆ.

ەسكە سالا كەتەيىك، اقپان ايىنىڭ سوڭىندا مەملەكەت باسشىسىنىڭ جارلىعىمەن ەرلان تۇرعىمبايەۆ قازاقستان رەسپۋبليكاسىنىڭ ىشكى ىستەر ءمينيسترى لاۋازىمىنان بوساتىلدى. كەيىننەن ول قازاقستان رەسپۋبليكاسى پرەزيدەنتىنىڭ كەڭەسشىسى لاۋازىمىنا تاعايىندالدى.

اۆتور: رۋسلان عابباسوۆ