«امانات» وكىلدەرى اۋەلى كىمنىڭ اماناتىن ورىندايتىندارىن ءتۇسىنىپ الۋى كەرەك - ءومىرالى جالايري
«كەشە پرەزيدەنت «Amanat» پارتياسىنىڭ ءماجىلىس پەن ءماسليحاتتارداعى وكىلدەرىن دەپۋتتاتىق ساۋالدارمەن شەكتەلمەي، بەلسەندى ارەكەت ەتۋگە ۇندەدى. سول كەزدە مەنىڭ ەسىمە ءوزىمنىڭ الماتى قالالىق پارتيا كوميتەتىندە دەپۋتات بولعان كەزىم ەسىمە ءتۇستى. ءبىزدىڭ №70-وكرۋگ دەيتىن سول كەزدەگى قاز م ۋ قالاشىعى جاقتا جاۋاپتى ايماعىمىز بولدى. سونداعى ماسەلەلەر شەشىمىن تاپپاي جاتسا، قالالىق تەلەۆيدەنيەنى شاقىرىپ، اتقارۋشى كوميتەت وكىلدەرىن سول جەرگە الدىرىپ، ماسەلەنى وقيعا ورنىندا تالقىلايتىنبىز. ودان ناتيجە بولماسا، حالىقتىڭ اتىنان اتقارۋشى كوميتەت باسشىلارىنا كىرەتىنبىز. ال قازىر دەپۋتاتتار ساۋال جولداپ قويىپ وتىرادى. وعان مينيسترلەر دە جاۋاپ جولداپ شەكتەلەدى. ودان ەشقانداي پايدا جوق. جالپاق تىلمەن ايتساق، پىسقىرمايدى دا. زاڭ بويىنشا دەپۋتاتتىق ماندات ولارعا ءار ماسەلەنىڭ تۇبىنە جەتۋگە مۇمكىندىك بەرەدى. سونى پايدالانباي وتىر. پرەزيدەنتتىڭ بەلسەندى بولىڭىزدار دەگەنى وسى ماعىنادا ايتىلىپ وتىر دەپ ەسەپتەيمىن»، - دەيدى عالىم.
ونىڭ پايىمىنشا، دەپۋتاتتاردىڭ سايلاۋشىلارمەن كەزدەسۋى فورمالدى قالىپقا ءتۇسىپ العان. اۋەلى وسى تۇرعىدا وزگەرىس قاجەت.
«قازىر دەپۋتاتىمىز دا، باسقامىز دا بۇكىل جۇمىستى قاعاز جۇزىندە ىستەيتىن بولىپ الدىق. ال ەلدىڭ ىشىنە بارىپ، ناقتى پروبلەمانى بەتپە- بەت زەرتتەۋ وتە سيرەك كەزدەسەدى. مىسالى ءوزى شىققان اۋىلدا ينتەرنەت جوق دەيىك. دەپۋتات سونداي پروبلەمانىڭ بار ەكەنىن ءبىرىنشى ءوز اياعىمەن بارىپ، كوز جەتكىزۋى كەرەك. سودان كەيىن پروبلەما شەشىلگەنشە ەلدى مەكەندەردى ينتەرنەتپەن قامتۋعا جاۋاپتى «قازاق تەلەكوم» سياقتى مونوپوليستەردىڭ تابالدىرىعىن توزدىرۋى كەرەك. ءماسليحات دەپۋتاتتتارى دا جەرگىلىكتى اكىمدەردىڭ شەشىمدەرىن ءبىراۋىزدان ماقۇلداۋ ءۇشىن قۇرىلعان ينستيتۋت بولىپ كەتتى. جالپى ولاردىڭ قۇزىرەتىن كوتەرۋ كەرەك. ياعني، «Amanat» وكىلدەرى اۋەلى كىمنىڭ اماناتىن ورىندايتىندارىن ءتۇسىنىپ الۋى كەرەك. قازىر ولار اكىمدەرگە تىم كىرىپتار. نەگىزى ءماسليحات اكىمدەردەن ەسەپ الىپ وتىرۋى كەرەك. ال بىزدە كەرىسىنشە. ول كىرىپتارلىقتان قۇتقارۋ ءۇشىن ءماجىلىستىڭ دە، ءماسليحاتتاردىڭ دا 50 پايىز قۇرامى ماجوريتارلىق جۇيەمەن سايلانۋى كەرەك. ايتپەسە جەرگىلىكتى اكىمدەر وڭشەڭ باس شۇلعىپ، ماقۇلداعىش ادامداردى ىرىكتەپ، باس كوتەرەر بەلسەندىلەردىڭ ءبارىن پارتيانىڭ ماڭايىنا جولاتپايدى. ءتىپتى پرايمەريزدىڭ ءوزى كوپ جەردە وسىنداي قاعيداتپەن وتكەنىن ۋاقىت كورسەتىپ وتىر»، - دەيدى زاڭ عىلىمدارىنىڭ دوكتورى.
زاڭگەر «Amanat» پارتياسى قوعامنىڭ دامۋىنا اسەر ەتەتىن قوزعاۋشى كۇشكە اينالۋى ءۇشىن زاڭداعى مۇمكىندىكتەرىن ەل مۇددەسىنە ساي پالاناۋى قاجەت دەپ ەسەپتەيدى.
«Amanat» دەگەن ات العان پارتيا ءوز مويىندارىنا ۇلكەن مىندەت جۇكتەپ وتىر نەگىزى. سونى ابىرويمەن اتقارۋ ءۇشىن حالىقتىڭ مۇددەسىنە ساي بولۋى كەرەك. ول ءۇشىن ءماجىلىس پەن ءماسليحات قۇرامىنىڭ كەمىندە جارتىسىن تىكەلەي حالىق سايلاۋى كەرەك. ءماسليحاتتىڭ قۇزىرەتىن كوتەرۋ كەرەك دەدىم عوي. نەگىزى زاڭدا وعان قاجەتتى ەرەجەنىڭ ءبارى بار. تەك ءىس جۇزىندە ورىندالۋى كەرەك. مىسالى، وتكەندە الماتى قالاسىنا جاڭا اكىم تاعايىندالعان كەزدە پرەزيدەنتتىڭ ۇسىنىسىن قالالىق ءماسليحات دەپۋتتارى ءبىراۋىزدان قولدادى. ال حالىقتىڭ ىشىندە قارسى بولعاندار بار ەكەنىن كوردىك. ءتىپتى پەتيتسيا دا جاريالادى. ياعني جەرگىلىكتى ءماسليحات حالىقتىڭ قالاۋىن بىلمەيدى نەمەسە ساناسقىسى كەلمەيدى. ايتپەسە قالالىق ءماسليحات دەپۋتاتتارىنىڭ ىشىنەن دە ول كانديداتۋرعا حالىق اتىنان نارازىلىق بىلدىرەتىن ءبىر ادام شىعۋى كەرەك ەدى عوي. ولاي بولمادى. قاعازدا ادەمى جازىلعان زاڭدار ومىردە دە ادەمى قالپىندا ورىندالۋى كەرەك. سوندا دەپۋتاتتاردىڭ، پارتيانىڭ جۇمىسى ناتيجەلى بولادى دەپ ويلايمىن»، - دەيدى ءومىرالى جالايري.
