09:46, 02 - ناۋرىز 2022 | GMT +5
«ماناس» جىرى نەمىس تىلىندە باسىلىپ شىقتى
بىشكەك. كابار- قازاقپارات - «ماناس» ەپوسى نەمىس تىلىندە جارىق كوردى. بۇل تۋرالى «كابار» اگەنتتىگى گەرمانيانىڭ قىزعىزستانداعى ەلشىلىگىنە سىلتەمە جاساپ جازدى، دەپ حابارلايدى قازاقپارات.
«قىرعىز- نەمىس ديپلوماتيالىق قارىم- قاتىناسىنىڭ 30 جىلدىعى اياسىندا ءبىز ەرەكشە دۇنيە ويلاپ تاپتىق: «ماناس» ەپوسى نەمىس تىلىندە جانە كوميكس تۇرىندەگى سۋرەتتەرمەن بەزەندىرىلە وتىرىپ شىعارىلدى! قازىر عانا بوياۋى كەۋىپ ۇلگەرمەگەن العاشقى باسىلىمدى قولىمىزعا الدىق!» - دەلىنگەن حابارلامادا.
«ماناس» - تەك قىرعىز حالقىنىڭ عانا ەمەس، كۇللى تۇركى ەلدەردىڭ تاريحى مەن سالت- داستۇرىنەن، رۋحاني الەمىنەن مول ماعلۇمات بەرەتىن ەنتسيكلوپەديا تەكتەس مۇرا. ماناس باتىردىڭ دۇنيەگە كەلگەنىنەن باستاپ، بۇكىل ءۇرىم- بۇتاعىمەن جالعاسقان باتىرلىق، ەرلىك ءداستۇر قوسا جىرلاناتىن ەپوس. وندا قازاق حالقىنىڭ تاريحىنا قاتىستى وقيعالار دا كەڭىنەن قامتىلعان، قازاق جىرلارىمەن سارىنداس تۇستارى دا جەتەرلىك.
