انا قۇشاعى
ماڭدايىڭىزدان سيپاعان ساتتە- اق جۇرەگىڭىزگە جىلۋلىق تاراپ، تاعدىرىڭىزدىڭ كۇرمەۋى شەشىلىپ، كوڭىلىڭىزگە كوكتەم قونىستانادى. سولاي ەمەس پە؟ !
كارتيناعا قارايسىز دا، انا مەيىرىمىمەن سۋسىنداعان بالالىعىڭىزدى ويلايسىز. سول بالداۋرەن مەزەتتىڭ قۋانىشى مەن باقىتى انانىڭ اپپاق قۇشاعىندا جاتقانىن باعامدايسىز. مۇنى سۋرەتشى دۋلات اييەۆ كوركەمونەردىڭ قۇدىرەتىمەن جەتكىزگەن. بالاۋسا كۇندەردىڭ بوياۋىن شىعارماسىنا ارقاۋ ەتىپ، كوپشىلىكتى انانىڭ مەيىرىمىمەن باۋرايدى. سودان دا بولار، تۋىندىسىنا «انا مەيىرىمى» دەپ ات قويعانى.
قىلقالام شەبەرى پولوتنولارمەن جۇمىس ىستەگەندە انىق بەينەلەۋ قاعيداسىنا سۇيەنگەن، وندا بەينەنىڭ سيپاتى مەن كورىنىسىن بايانداۋدا نازىك ءتاسىلدى پايدالانىپ، مۇلتىكسىز سىرلاپ، بوياۋلارىنىڭ ءتۇسى مەن ءوڭىن ۇيلەستىرە وتىرىپ كورسەتەدى. سيۋجەتتىڭ ىشكى ءمانى مەن قىسقاشا مازمۇنىن جارىقتاندىرا ءتۇسىپ، جاڭا رەاليزمنىڭ وكىلى ەكەنىن بايقاتادى. سۋرەتكەردىڭ ءوز شىعارماشىلىعى تۋرالى: «مەن ءوزىمنىڭ سۋرەتتەرىمدە باسقالار سياقتى جيھانگەزبىن. بەينەلەۋ ونەرى - مەن ءۇشىن ءومىردى تانۋ قۇرالى. سۋرەتتەرىمنىڭ نەگىزگى كەيىپكەرى - ادام. مەن ونى جاقسى كورەتىندىگىمدى سەزىندىم» دەپ باعا بەرەتىنى بار. بۇل ونىڭ ونەرىنىڭ بىرەگەيلىگىن تانىتادى.
نەگىزى ونەر يەسىنىڭ جاڭاشىلدىعى - تۇرمىستىق جانر تۇرعىسىندا، ياعني انانىڭ بالاعا، ادامداردىڭ ءبىر- بىرىنە دەگەن قارىم- قاتىناسى، ءمولدىر سۇيىسپەنشىلىگى جانە مەيىرىمدىلىك سەزىمدەرىن قانىق تۇستەر ارقىلى بەينەلەپ، ۇلتتىق سانا- سەزىمدى وياتۋىندا. بۇل تۇرعىدا ول كەز كەلگەن وبرازدى، سيۋجەتتەردى ۇتىمدى پايدالانادى.
دۋلات الييەۆتىڭ ادام وبرازىن سومداۋداعى پسيحولوگيالىق سەزىمگە بەرىلگەن كوركەم شىعارما-لارى كۇندەلىكتى ومىردەن الىنعان. اتالعان «انا مەيىرىمى» كوركەم تۋىندىسىندا انانىڭ بالاعا دەگەن رياسىز پەيىلى ديالوگ تۇرىندە شىنايى بەرىلگەن. ءاربىر انا ءسابيىنىڭ ماڭدايىنان يىسكەپ ماۋقىن باسارى داۋسىز. بۇل انا مەن بالا اراسىنداعى اسىل ماحابباتتان ورىلگەن قۇدىرەتتى كومپوزيتسيا.
مۇحتار كۇمىسبەك
egemen.kz
