اتىراۋ وبلىسىنداعى تەڭىز ۆاحتا كەنتىندە وندىرىستىك قالدىق جانىپ جاتىر

اتىراۋ. قازاقپارات - اتىراۋ وبلىسىنداعى تەڭىز ۆاحتالىق كەنتىندە وندىرىستىك قالدىق جانىپ جاتىر، دەپ حابارلايدى قازاقپارات.

وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، ءورت بۇگىن، 1- ناۋرىزدا جەرگىلىكتى ساعات 16:40 تا تۇتانعان.

«جىلىوي اۋدانىنداعى تەڭىز ۆاحتالىق كەنتىندەگى اشىق الاڭدا وندىرىستىك قالدىق جانىپ جاتىر. «تەڭىزشيەۆرويل» ج ش س ءورت ءسوندىرۋ جانە اپاتتىق قىزمەتىنىڭ مالىمەتىنشە، ءورت تۇتانعان اۋماقتىڭ اۋدانى - 200 شارشى مەتر. جالىندى سوندىرۋگە «تەڭىزشيەۆرويلدىڭ» ءورت ءسوندىرۋ جانە اپاتتىق قىزمەتىنەن 17 قىزمەتكەر مەن 4 تەحنيكا، «COCR» ج ش س- نەن 6- قىزمەتكەر مەن 2 قىزمەتكەر جۇمىلدىرىلعان»، - دەپ حابارلادى دەپارتامەنتتىڭ باسپا ءسوز قىزمەتىنەن.

وقيعا ورنىنا بارۋ ءۇشىن جىلىوي اۋداندىق توتەنشە جاعدايلار بولىمىنەن 10 قىزمەتكەر مەن 2 تەحنيكا جولعا شىقتى.

اۋدان ورتالىعى - قۇلسارى قالاسى مەن تەڭىز ۆاحتالىق كەنتىنىڭ ارالىعىنداعى قاشىقتىق - 90 شاقىرىم.

ەسكە سالا كەتەلىك، بۇعان دەيىن اتىراۋدا ءبىر مەزەتتە تۇراقتا تۇرعان ەكى جۇك كولىگى ورتەنىپ كەتكەن بولاتىن.