ەلوردا دارىگەرلەرى كوروناۆيرۋسقا شالدىققان اۋىر حالدەگى ناۋقاستى امان الىپ قالدى
قاۋىپتى ۆيرۋس ونى اينالىپ ءوتىپ كەتەدى دەگەنگە سەنىم ارتقان ەكەن. ەكپەدەن باس تارتقاننان كەيىن ارى قارايعى جاعدايىن بولجاۋدىڭ دا قاجەتى جوق ەدى. ناۋقاس اۋىر جاعدايدا رەانيماتسياعا ءتۇستى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
دارىگەرلەردىڭ ايتۋىنشا، ناۋقاستىڭ جاعدايى كۇرت ناشارلاعان. ءۇش اپتا بويى دارىگەرلەر قولىنان كەلگەننىڭ ءبارىن جاسادى.
«ۆيرۋستى جۇقتىرعان كەزدە ونىڭ جاسى، ارتىق سالماعى، قانت ديابەتى جانە جوعارى قان قىسىمى جاعدايدى قيىنداتىپ جىبەردى. حالىنىڭ كۇرت ناشارلاعانىنا بايلانىستى رەانيماتسياعا جىبەرىلىپ، وپەراتيۆتى تۇردە ەم الدى. جاعدايى تۇراقتانعاننان كەيىن ونى قاراپايىم پالاتاعا اۋىستىردىق. وندا ول قازىردىڭ وزىندە وتتەگى تەراپياسىن، باسقا دا ەمدەۋدەن ءوتتى. مىنە وسىدان كەيىن عانا ۇيىنە جىبەردىك»، - دەدى دارىگەر ساپارگۇل بەردەشوۆا-ابىلدايەۆا.
امان-ەسەن ساۋىعىپ شىققان ول وتباسىنا ورالعانى ءۇشىن اۋرۋحانانىڭ بۇكىل مەديتسينا قىزمەتكەرلەرىنە العىس ايتتى.
ناۋقاس ءوزىنىڭ امان قالعانىن جانە دارىگەرلەردىڭ ارقاسىندا تۋىستارىنىڭ ورتاسىندا جۇرگەنىن ايتتى.
«ەگەر دارىگەرلەر ءتيىستى دەڭگەيدە ەمدەمەسە ارى قاراي ءومىر سۇرە الماس ەدىم. اۋرۋحانادا جاتقانىمدا جاقىندارىمدى ەندى كورمەيمىن دەپ قورىقتىم. دارىگەرلەردىڭ بارىنە العىسىم شەكسىز. مەنى ەمدەپ، امان-ەسەن شىعارعاندارىڭىز ءۇشىن راقمەت، ەندى وتباسىممەن بىرگە بولا الامىن!» - دەدى ۇكى مەرساعاتوۆا.
