قورعانىس مينيسترلىگى زاپاستاعى وفيتسەرلەردى اسكەرگە شاقىرۋعا قاتىستى تۇسىنىك بەردى
«قازاقستان رەسپۋبليكاسى ۇكىمەتىنىڭ قاۋلىسىنا سايكەس 2022-جىلى اسكەري قىزمەتكە جارامدى جانە ودان وتپەگەن زاپاستاعى وفيتسەرلەر ەكى جىل مەرزىمگە اسكەري قىزمەتكە شاقىرىلاتىن بولادى. زاپاستاعى وفيتسەرلەردى شاقىرۋ جىل سايىن جۇزەگە اسىرىلادى.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭىنىڭ 32-بابىنا سايكەس، اسكەري قىزمەتكە جارامدى 29 جاسقا دەيىنگى زاپاستاعى وفيتسەرلەر ۇكىمەت قاۋلىسى نەگىزىندە ۋاكىلەتتى ورگانداردىڭ وتىنىمدەرى بويىنشا بەيبىت ۋاقىتتا وفيتسەرلەر قۇرامىنىڭ لاۋازىمدارىندا اسكەري قىزمەت وتكەرۋ ءۇشىن شاقىرىلادى. بيىل زاپاستاعى 190 وفيتسەر، ونىڭ ىشىندە قارۋلى كۇشتەردىڭ 150 وفيتسەرى جانە ۇلتتىق قاۋىپسىزدىك كوميتەتى شەكارا قىزمەتىنىڭ 40 وفيتسەرى اسكەرگە شاقىرىلاتىن بولادى»، - دەلىنگەن مينيسترلىك حابارلاماسىندا.
ەسكە سالايىق، بۇگىن ق ر پرەمەر-ءمينيسترى ءاليحان سمايىلوۆ زاپاستاعى وفيتسەرلەردى اسكەري قىزمەتكە شاقىرۋ تۋرالى قاۋلىعا قول قويعان بولاتىن.
قۇجات العاشقى رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.
