كوكتەمنىڭ العاشقى كۇنى شىمكەنتتە بادام اعاشى گۇلدەدى

شىمكەنت. قازاقپارات - كوكتەمنىڭ العاشقى كۇنى شىمكەنتتە بادام اعاشى گۇلدەدى، دەپ حابارلايدى قازاقپارات ءتىلشىسى.

شىمكەنت قالاسى سامال-2 مولتەكاۋدانىنىڭ تۇرعىنى كەرىمبي كەرىمقۇلوۆتىڭ اۋلاسىندا بادام اعاشى گۇلدەدى.

مۇنى كوپشىلىك جاقسىلىققا بالاپ وتىر.

«ءبىز بادام دەپ اتايمىز. ال، كوپشىلىك ميندال دەپ ءجۇر. ءوزىم 2009-جىلى ءدانىن الىپ كەلىپ ەككەن بولاتىنمىن. ءۇش جىل بولدى، قازىر ءونىم الىپ جاتىرمىن. بيىل دا نىشان بەرىپ، گۇلدەپ تۇر. ءبىر اعاشتان 10 كەلى ءونىم الامىز» - دەيدى تۇرعىن.

جالپى بادام اعاشى تاشكەنت، تاجىكستان سەكىلدى جىلى ايماقتا وسەدى. قازىر اتالعان اعاش شىمكەنتتىڭ دە اينالاسىندا كوبەيىپ كەلەدى. كەرىمبي كەرىمقۇلوۆتىڭ اۋلاسىندا قازىر ەكى ءتۇبى گۇلدەپ تۇر. ال، قالعان كوشەتتەرى ءبۇر جارىپ جاتىر.

«ءوزىم 1000 تۇپكە دەيىن كوبەيتىپ، تانىستارىما ۇلەستىرىپ جىبەردىم. العان ءونىمدى بالا-شاعام ەرمەك ەتەدى. ءالى ساتۋعا كەلمەدى. جالپى بازاردا ءبىر كەلىسى 5000 تەڭگەدەن ساتىلىپ جاتىر» - دەيدى تۇرعىن.