بالا تۋۋعا بايلانىستى مەملەكەتتىك قىزمەتتەر بانك قوسىمشالارىندا قولجەتىمدى بولادى

نۇر-سۇلتان. قازاقپارات - بالا تۋۋمەن بايلانىستى مەمقىزمەتتەر بانك قوسىمشالارىندا قولجەتىمدى بولادى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ۇكىمەت وتىرىسىندا ءمالىم ەتتى، دەپ حابارلايدى قازاقپارات ءتىلشىسى.

«بىلتىر اعىمداعى بيزنەس- پروتسەستەرگە جۇرگىزىلگەن تالداۋ ناتيجەسىندە مەملەكەتتىك قىزمەتتەردىڭ دامۋىن تەجەيتىن ءبىرقاتار فاكتورلار انىقتالدى. اتاپ ايتقاندا، زەينەتاقى مەن جاردەماقى تاعايىنداۋ ءۇشىن قاجەتتى «تاريحي» دەرەكتەردىڭ بولماۋى، موبيلدى ازاماتتار بازاسىندا تىركەۋدىڭ بولماۋى. وسىعان بايلانىستى ءبىز مەملەكەتتىك قىزمەت كورسەتۋ ۇدەرىستەرىن رەينجينيرينگ جانە ترانسفورماتسيالاۋ بويىنشا جۇمىس جۇرگىزۋدەمىز. بۇگىنگى كۇنى ەلەكتروندىق فورماتتا 45 مەملەكەتتىك قىزمەتتىڭ 42 ءتۇرى نەمەسە 93 پايىز ۇسىنىلادى، ونىڭ ىشىندە 21 قىزمەتتى نەمەسە 43 پايىز پرواكتيۆتى تۇردە الۋعا بولادى»، - دەدى سەرىك شاپكەنوۆ.

ونىڭ ايتۋىنا قاراعاندا، 2021 -جىلى الەۋمەتتىك- ەڭبەك سالاسىندا بارلىعى 12,6 ميلليون مەملەكەتتىك قىزمەت كورسەتىلگەن. ونىڭ ىشىندە 9,1 ميلليون نەمەسە 72 پايىز قىزمەت ەلەكتروندى تۇردە كورسەتىلدى.

«بۇل 2020 -جىلمەن سالىستىرعاندا 12 پايىز ارتىق. 2025 -جىلعا قاراي ءبىز بارلىق مەملەكەتتىك قىزمەتتەردى 100 پايىز ەلەكتروندى فورماتقا كوشىرۋدى جوسپارلادىق»، - دەدى سەرىك شاپكەنوۆ. سونداي-اق، مينيستر، حالىقتىڭ قىزمەت الۋ مۇمكىندىكتەرىن كەڭەيتۋ ءۇشىن بىلتىر قازان ايىندا ەكى بانكپەن بىرلەسىپ، ولاردىڭ پلاتفورمالارىندا بالا تۋۋمەن بايلانىستى مەملەكەتتىك قىزمەتتەر سەرۆيسىن ىسكە قوسقانىن اتادى.

«تەك 2021 -جىلدىڭ ءتورتىنشى توقسانىندا بالالارى بار 16,5 مىڭنان استام وتباسى ۇيدە وتىرىپ، ەكىنشى دەڭگەيلى باكنتەردىڭ ءموبيلدى قوسىمشالارى ارقىلى قىزمەت الدى. وسى پراكتيكانى باسقا بانكتەردىڭ موبيلدى قوسىمشالارى ارقىلى ەنگىزۋ جونىندەگى جۇمىس جالعاساتىن بولادى»، - دەدى سەرىك شاپكەنوۆ.

اۆتور: ەسىمجان ناقتىباي