شەتەلدىكتەر نۇر- سۇلتان قالاسىندا تاكسي قىزمەتىمەن زاڭسىز اينالىسقان

نۇر- سۇلتان. قازاقپارات - نۇر- سۇلتاندا تاكسي قىزمەتىمەن زاڭسىز اينالىسقان شەتەلدىكتەر ۇستالدى، دەپ حابارلايدى قازاقپارات ءتىلشىسى.

نۇر- سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، «ياندەكس»، «Uber» قوسىمشالارى ارقىلى تاكسي قىزمەتىمەن زاڭسىز اينالىسقان 21 شەتەلدىك ۇستالعان. ولاردىڭ جولاۋشى تاسىمالداۋعا رۇقسات بەرەتىن ليتسەنزياسى بولماعان.

«اتالعان شەتەلدىكتەرگە ق ر اكىمشىلىك قۇقىق بۇزۋ تۋرالى كودەكسىنىڭ 463-بابى بويىنشا، ياعني «ءتيىستى تىركەۋسىز، رۇقساتسىز نەمەسە ءتيىستى حابارلاما جىبەرمەستەن كاسىپكەرلىكپەن نەمەسە وزگە قىزمەتپەن اينالىسقانى» ءۇشىن 15 ا ە ك (45945 تەڭگە - رەد) مولشەرىندە ايىپپۇل سالىندى. سونداي- اق سوت ءىس ماتەريالدارىن ق ر اكىمشىلىك قۇقىق بۇزۋ تۋرالى كودەكسىنىڭ 517-بابىن، ياعني «شەتەلدىكتى نەمەسە ازاماتتىعى جوق ادامدى جۇمىسقا ورنالاستىرۋ زاڭناماسىن بۇزۋ» ماسەلەسى بويىنشا قارادى.

سوت قاۋلىلارى نەگىزىندە 8 جۇرگىزۋشى ق ر اۋماعىنان شىعارىلدى. قالعان 13 جۇرگىزۋشى اتالمىش باپتى بۇزعانى ءۇشىن 25 ا ە ك (76575 تەڭگە - رەد) كولەمىندە ايىپپۇل ارقالادى»، - دەپ جازادى دەپارتامەنتتىڭ باسپا ءسوز قىزمەتى.

دەپارتامەنتتىڭ دەرەگى بويىنشا، اتالعان شەتەلدىكتەر تىزگىندەپ كەلگەن اۆتوكولىكتەر كوممۋنالدىق ايىپ تۇراعىنا قويىلدى.