ۋكراينا- رەسەي كەلىسسوزى: تاراپتار قايتا كەزدەسەتىن بولىپ تارقاستى

نۇر- سۇلتان. قازاقپارات - ۋكراينا مەن رەسەي وكىلدەرى پريپياتتەگى كەلىسسوزدەردىڭ العاشقى راۋندىنان كەيىن ءوز ەلدەرىنىڭ استانالارىنا قايتاتىن بولدى.

كەلىسسوزدە ايتىلعان شارتتاردى سول جاقتا پىسىقتاپ، قايتا جولىعاتىن بولىپ ۋاعدالاستى. بەلتا اگەنتتىگى ۋكراينا پرەزيدەنتى كەڭسەسى باسشىسىنىڭ كەڭەسشىسى ميحايل پودولياكتىڭ جۋرناليستەرگە بەرگەن مالىمەتىنە سۇيەنىپ وسىنداي اقپارات تاراتتى، دەپ حابارلايدى قازاقپارات ءتىلشىسى.

«بۇگىن ۋكراينا مەن رەسەي دەلەگاتسياسى كەلىسسوزدەردىڭ ءبىرىنشى راۋندىن وتكىزدى. ونىڭ نەگىزگى ماقساتى ۋكرايناداعى اتىستى توقتاتۋ جانە سوعىس قيمىلدارىن تالقىلاۋ بولدى. تاراپتار بەلگىلى ءبىر شەشىمدەر بەلگىلەنگەن ءبىرقاتار باسىم تاقىرىپتاردى انىقتادى. سول شەشىمدەر بويىنشا قانداي دا ءبىر كونسۋلتاتسيالار الۋ ءۇشىن قوس تاراپتىڭ وكىلدەرى ءوز ەلدەرىنىڭ استانالارىنا قايتادى. سونداي- اق، قوس تاراپ كەلىسسوزدىڭ ەكىنشى راۋندىن وتكىزۋ مۇمكىندىگىن تالقىلادى. سول كەزدەسۋدە بۇگىنگى كەلىسسوزدە ايتىلعان ماسەلەلەر بويىنشا ناقتى پراكتيكالاىق شەشىمدەر قابىلدانۋى مۇمكىن»، - دەدى ميحايل پودولياك.

ال رەسەي دەلەگاتسياسىنىڭ جەتەكشىسى، ر ف پرەزيدەنتىنىڭ كومەكشىسى ۆلاديمير مەدينسكيدىڭ سوزىنشە، ەكى ەلدىڭ وكىلدەرى تالقىلاناتىن ماسەلەلەر بويىنشا نەگىزگى باعىتتاردى انىقتاعان.

«ءبىز ورتاق ۇستانىمداردى بولجاۋعا مۇمكىندىك بەرەتىن كەيبىر نۇكتەلەردى تاپتىق»، - دەدى رەسەي تاراپىنىڭ وكىلى. ونىڭ ايتۋىنشا، تاراپتاردىڭ كەلەسى كەزدەسۋى بەلارۋس- پولشا شەكاراسىندا وتەدى.

«رەسەي مەن ۋكراينا بەلارۋستەگى كەلىسسوزدە ءبىر- ءبىرىن تىڭدادى»، - دەدى جۋرناليستەرگە رەسەي فەدەراتسياسى دەلەگاتسياسىنىڭ مۇشەسى، ر ف مەملەكەتتىك دۋماسىنىڭ حالىقارالىق ىستەر جونىندەگى كوميتەتىنىڭ ءتوراعاسى لەونيد سلۋتسكي. ونىڭ سوزىنە قاراعاندا، كەلىسسوزدەر بارىسىندا اتىستى توقتاتۋ جانە دەميليتاريزاتسيا ماسەلەلەرى تالقىلانعان.

ايتا كەتەيىك، بۇگىن ۋكراينا مەن بەلارۋس شەكاراسىنداعى گومەل وبلىسىندا ۋكراينا- رەسەي كەلىسسوزى باستالعان بولاتىن.