ۋكراينادان ورالعان وتانداستارىمىز بەينەبايلانىسقا شىعادى
تەلەارنا مالىمەتىنشە، كۇنى بويى تىكەلەي ەفيردە وتەتىن تەلەكوپىر بارىسىندا ۇلتتىق ارنا تىلشىلەرى نۇر-سۇلتان مەن الماتى قالاسىنداعى ستۋديالاردان، ايماقتاردان تىكەلەي قوسىلىمعا شىعىپ، قوعامداعى قىزمەتى ارقىلى كوپشىلىكتىڭ العىسىنا بولەنىپ جۇرگەن قازاقستاندىقتار تۋرالى كورسەتەدى.
قاڭتار وقيعاسى كەزىندە حالىققا ەرىكتى تۇردە كومەك كورسەتكەن ازاماتتارمەن ستۋديادا تىكەلەي ەفيردە سۇحبات قۇرادى. تەلەمارافون كەيىپكەرلەرى اراسىندا قاڭتار وقيعاسى كەزىندە اۋەجايدا قالىپ قويعان بەيبىت ازاماتتاردى ۇيىنە جاسىرىپ، بۇزاقىلاردان قۇتقارىپ قالعان الماتىلىق دانا سۇلەيمەنوۆا، اقتوبەدەگى تۇزەۋ مەكەمەسىنەن قاشپاق بولعان 20 عا جۋىق سوتتالۋشىعا جالعىز ءوزى توسقاۋىل بولعان وفيتسەر ەربول وتاربايەۆ، مۇمكىندىگى شەكتەۋلى بالالاردى پاراليمپياداعا دايىنداپ جۇرگەن نۇر-سۇلتانداعى «جاس جاۋىنگەر» دەنە شىنىقتىرۋ-ساۋىقتىرۋ كلۋبىنىڭ جەتەكشىسى سادىق بايىمبەتوۆ، قۋاڭشىلىق كەزىندە فەرمەرلەرگە ءشوپ جونەلتكەن شىمكەنت قالاسىنىڭ تۇرعىنى قۇرمەت تالاپقازى، سال اۋرۋىنىڭ ەڭ اۋىر تۇرىنە شالدىققان بالالارعا تەگىن ەمدىك ماسساج جاساپ جۇرگەن ەلوردالىق لاتيف پارپيەۆ، بوكستاعى كارەراسىن تاستاپ، اۋىل بالالارىنا سپورت كلۋبىن سالعان، تەگىن جاتتىعۋ وتكىزىپ جۇرگەن ەلوردالىق ميراس ماسابايەۆ، 50 بالانى جول اپاتىنان امان الىپ قالعان پاۆلودار وبلىسى باياناۋىل اۋداندىق ىشكى ىستەر ءبولىمىنىڭ قىزمەتكەرلەرى - پوليتسيا ستارشيناسى مۇرات نۇرسەيىتوۆ پەن اعا سەرجانت بايانبەك ءجۇنىسوۆ، 25 جاسىندا 5 بالا اسىراپ العان جامبىلدىق وتباسى التىناي تاپەلوۆا مەن باقىتجان الپىسبايەۆ، شىعىس قازاقستان وبلىسىنداعى كوكتال اۋىلىنا كوپىر سالۋعا باستاماشى بولعان سەمەيلىك مۇعالىم احات راقىشيەۆ بار.
«سونىمەن بىرگە، تەلەمارافون بارىسىندا ارنايى رەيستەرمەن ۋكراينادان ورالعان ەل ازاماتتارى بەينەبايلانىسقا شىعادى»، - دەپ اتاپ وتەدى تەلەارنادان.
ايتا كەتەيىك، قازاقستاندىقتاردىڭ ستۋديا قوناقتارىنا مىنا تەلەفون نومىرلەرى 87172757141، 87789915610 ارقىلى بايلانىسقا شىعىپ، العىس ايتۋعا مۇمكىندىگى بار.
العىس تەلەمارافونى 1- ناۋرىز ساعات 09:30، 11:00، 12:00، 13:10، 15:15، 17:15 تە تىكەلەي ەفيردە وتەدى.
