قازاقستان حالقىنا قورىنان قاڭتار وقيعاسىنا قاتىستى كىمدەرگە كومەك كورسەتىلەدى
بۇل تۋرالى اتالعان قوردىڭ ءتوراعاسى بولات جامىشيەۆ ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، قامقورلىق كەڭەسى قازا بولعان اسكەريلەردىڭ، ىشكى ىستەر ورگاندارى، ۇلتتىق قاۋىپسىزدىك ورگاندارى قىزمەتكەرلەرىنىڭ وتباسىلارىنا كومەك كورسەتۋ شەشىمىن قابىلدادى.
مۇنىمەن قوسا، قىزمەتكەرلەر اراسىندا اۋىر جاراقات العاندار دا قامتىلماق. 3 قازا تاپقان جانە 4 جارالانعان بالانىڭ وتباسى، سونداي-اق قاڭتار وقيعاسى كەزىندە كەزدەيسوق قۇربان بولعانداردىڭ وتباسىلارى ەسكەرىلمەك.
«ازاماتتاردىڭ تىزىمىنە توقتالساق، ءبىز ومبۋدسمەندەردەن العان ءتىزىمدى نازارعا الدىق. وسى ورايدا بالا قۇقىقتارى جونىندەگى ۋاكىل ارۋجان ساين مەن ادام قۇقىقتارى جونىندەگى ۋاكىل ەلۆيرا ءازىموۆانىڭ جولداعان اقپاراتى قارالدى. ارينە، بۇل ادامدار ازاماتتىق تۇلعالاردىڭ قايتىس بولۋىنىڭ بارشا فاكتىسىن بىلمەۋى مۇمكىن. الايدا ولارعا جولدانعان ۇندەۋلەرگە جانە كەيبىر ىستەردىڭ رەزونانستىلىعىن ەسكەرە وتىرىپ، ولار (ومبۋدسمەندەر) ءتيىستى ءتىزىمدى جاسادى»، - دەدى ب. جامىشيەۆ ورتالىق كوممۋنيكاتسيالار قىزمەتىندە.
وسى ورايدا ول قاڭتار وقيعاسىنىڭ كەزدەيسوق قۇربانى بولعانداردىڭ تۋىستارىنا كومەك كورسەتۋ تۋرالى شەشىم قابىلدانعانىن جەتكىزدى.
«بىزگە كەلىپ تۇسكەن تىزىمگە بايلانىستى بۇل ادامداردىڭ قازا بولۋىنىڭ ءمان-جايىن قۇزىرلى ورگاندارمەن انىقتاۋ كەرەك بولادى. وسى دەرەكتەردىڭ انىقتالۋىنا قاراي كومەك كورسەتەتىن بولامىز. اتاپ ايتقاندا، قايىرىمدىلىق قورى رەتىندە قاڭتار وقيعاسىنىڭ كەزدەيسوق قۇرباندارىنا كومەك كورسەتەمىز دەگەن بەلگى بەرىپ وتىرمىز. وزدەرىڭىز بىلەسىزدەر، تەرگەۋ امالدارى اياقتالعاننان كەيىن، وسى باستامالاردى تولىق كولەمدە ىسكە اسىرۋ مۇمكىن بولادى»، - دەدى ب. جامىشيەۆ.
ايتا كەتەيىك، بۇگىن «قازاقستان حالقىنا» قورى قاڭتار وقيعالارى كەزىندە قازا تاپقاندار مەن جارالانعانداردىڭ وتباسىلارىنا كومەك كورسەتۋگە قاتىستى مالىمەت جاريالادى.
