ۆيتسە-پرەمەر مەديتسيناداعى زەرتحانالىق قىزمەتتەردى جەكە سەكتورعا تاپسىرۋدى ۇسىندى

نۇر-سۇلتان. قازاقپارات - ق ر پرەمەر-ءمينيسترىنىڭ ورىنباسارى ەرالى توعجانوۆ دەنساۋلىق ساقتاۋ مينيسترلىگىنىڭ كەڭەيتىلگەن القا وتىرىسىندا مەديتسيناداعى زەرتحانالىق قىزمەتتەردىڭ ءبارىن جەكە سەكتورعا تاپسىرۋدى ۇسىندى، دەپ حابارلايدى قازاقپارات ءتىلشىسى.

«ەلىمىزدە كونسۋلتاتسيالىق-دياگنوستيكالىق قىزمەتتەردى قارجىلاندىرۋ كولەمى 9 ەسە ءوستى. باعاسى قىمبات زەرتتەۋلەر بۇكىل ازاماتتارعا مەديتسينالىق سەبەپتەر نەگىزىندە قول جەتىمدى بولدى. مۇنداي ورتالىقتار باتىس ءوڭىردى قوسا العاندا، ءتورت وڭىردە، سونداي-اق قاراعاندىدا بار. مەنىڭ ويىمشا، بۇل وتە ماڭىزدى ناتيجە. ءبىز جاقىندا الماتىدا وسىنداي ورتالىق اشتىق. ول ورتالىقتى جەكە سەكتور اشىپ وتىر. وسى باعىتتاعى جۇمىستاردى ىنتالاندىرۋىمىز كەرەك. بارلىق قىزمەتتەردى، سونىڭ ىشىندە زەرتحانالىق قىزمەتتەردى جەكە سەكتورعا بەرۋ كەرەك دەپ ويلايمىن»، - دەدى ەرالى توعجانوۆ.

ونىڭ ايتۋىنا قاراعاندا، جەدەل جاردەم قىزمەتىنىڭ ستاندارتتارى جەتىلدىرىلمەك.

«باعدارلاما اياسىندا ۇكىمەت اۋىلدا كەمىندە 80 نىسان سالۋدى جوسپارلاعان. سول ارقىلى مەديتسينالىق ينفراقۇرىلىمدى جاقسارتۋ، اۋداندىق اۋرۋحانالاردى، پەرزەنتحانالاردى قاجەتتى جابدىقتارمەن جاراقتاندىرۋ، جەدەل جاردەم قىزمەتىن كەزەڭ-كەزەڭىمەن مەديتسينالىق كومەك كورسەتۋ ستاندارتتارىنا كوشىرۋ شارالارىن ىسكە اسىرۋ كوزدەلىپ وتىر»، - دەدى ۆيتسە-پرەمەر.