زەينەتاقى جيناعىن بالا ەمىنە جۇمساۋعا رۇقسات ەتىلمەك

نۇر- سۇلتان. قازاقپارات - قازاقستاندا اتا- انالار ءبىرجولعى زەينەتاقى تولەمدەرىن بالاسىن ەمدەتۋگە جۇمساي الادى. مۇنداي وزگەرىس ق ر دەنساۋلىق ساقتاۋ ءمينيسترىنىڭ «ەمدەلۋگە بەرىلەتىن ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى» بۇيرىعىنا ەنگىزىلمەك، دەپ حابارلايدى قازاقپارات ءتىلشىسى.

«الۋشىلارعا ءبىرجولعى زەينەتاقى تولەمدەرىن ءوز بالاسىن ەمدەۋگە پايدالانۋعا جول بەرىلەدى»، - دەلىنگەن دەنساۋلىق ساقتاۋ مينيسترلىگىنىڭ اشىق نورماتيۆتىك- قۇقىقتىق اكتىلەر پورتالىنا ورنالاستىرىلعان بۇيرىعىنىڭ جاڭا رەداكسياسىندا.

قۇجاتتىڭ جاڭا رەداكسياسىنا سايكەس:

- ءوتىنىش بەرۋشى قورىتىندىنى العاننان كەيىن مەديتسينالىق ۇيىمدى (سونىڭ ىشىندە شەتەلدىك ۇيىمدى قوسا العاندا) تاڭدايدى؛

- شارتتىڭ سكانەرلەنگەن نۇسقاسىن نەمەسە تولەم شوتىن ءارى قاراي بەكىتەدى؛

- ۋاكىلەتتى وپەراتوردىڭ ينتەرنەت- رەسۋرسىنداعى ءوزىنىڭ جەكە كابينەتىندە دارىگەرلىك كوميسسيانىڭ قورىتىندىسىن قوسا بەرە وتىرىپ، ونىمەن مەديتسينالىق قىزمەتتەر كورسەتۋ تۋرالى شارت جاساسادى. الۋشى ۇسىنعان ءبىرجولعى زەينەتاقى تولەمدەرىنىڭ نىسانالى ماقساتىنا سايكەس كەلگەن كەزدە، ۋاكىلەتتى وپەراتور الۋشىدان قۇجاتتاردى العان كۇننەن باستاپ 10 جۇمىس كۇنى ىشىندە ءبىرجولعى زەينەتاقى تولەمدەرىنىڭ نىسانالى پايدالانىلۋىن تەكسەرەدى.

ەمدەلۋ ءۇشىن ءبىرجولعى زەينەتاقى تولەمدەرىنىڭ نىسانالى پايدالانىلۋىن راستايتىن قۇجاتتار مىنالار:

مەديتسينالىق ۇيىم مەن الۋشى اراسىندا جاسالعان مەديتسينالىق قىزمەتتەر كورسەتۋ تۋرالى شارت جانە (نەمەسە) دارىلىك زاتتاردى ساتىپ الۋعا ساتۋشى مەن الۋشى اراسىنداعى شارت. مەديتسينالىق قىزمەتتەردى شەتەلدە الۋ كەزىندە دەرەكتەمەلەردى (تولەم شوتىن) جانە (نەمەسە) مەديتسينالىق ۇيىم مەن الۋشى اراسىندا جاسالعان مەديتسينالىق قىزمەتتەردى كورسەتۋ تۋرالى شارتتى (قۇجاتتار شەت تىلىندە جاسالعان جاعدايلاردا نوتاريالدى كۋالاندىرىلعان اۋدارماسىن قوسا بەرە وتىرىپ) كورسەتە وتىرىپ، تولەمدى جۇزەگە اسىرۋ ءۇشىن قاجەتتى قۇجاتتى ۇسىنۋعا جول بەرىلەدى.

اۆتور: مارلان جيەمباي