تۇركيا بوسفور مەن داردانەل بۇعازدارىن جاپپاق

نۇر- سۇلتان. قازاقپارات - تۇركيا ۋكرايناداعى جاعدايدى - سوعىسقا ۇلاستى دەپ بوسفور جانە داردانەل بۇعازدارىن اسكەري كەمەلەرگە جاپپاق.

شەشىم مونترە كونۆەنسياسىنىڭ 19-بابىنا سايكەس قابىلدانادى.

بۇل تۋرالى ەلدىڭ سىرتقى ىستەر ءمينيسترى ميەۆلۇت چاۆۋشوعلۇ جەرگىلىكتى ارناعا بەرگەن سۇحباتىندا مالىمدەدى.

قۇجات بويىنشا تۇركيا سوعىسقا قاتىسۋشى ەلدەرگە تەڭىز جولىن شەكتەي الادى. ال جولعا شىققان اسكەري كەمەلەردىڭ كەلگەن ەلىنە ورالۋىنا عانا مۇمكىندىك بار.

ەستەرىڭىزگە سالا كەتەيىك، ۋكراينا پرەزيدەنتى ۆلاديمير زەلەنسكي مەن ەلدىڭ تۇركياداعى ەلشىسى بىرنەشە رەت تۇركيادان رەسەي كەمەلەرى ءۇشىن بۇعازداردى جابۋدى تالاپ ەتكەن ەدى.

ميەۆلۇت چاۆۋشوعلۇ، تۇركيانىڭ سىرتقى ىستەر ءمينيسترى:

- مونترە كونۆەنسياسى قارا تەڭىز جاعالاۋداعى جانە جاعالاۋدان تىس ەلدەردىڭ اسكەري كەمەلەرىنىڭ ءوتۋىن رەتتەيدى. تۇركيا وسى ۋاقىتقا دەيىن كونۆەنسيانى قاتاڭ ساقتادى. ءبىز مونترە كونۆەنسياسىنىڭ 19-بابىن اشىق تۇردە ورىندايمىز. باستاپقىدا بۇل رەسەيدىڭ شابۋىلى بولدى، ءبىز مۇنى ساراپشىلارمەن، اسكەريلەرمەن جانە زاڭگەرلەرمەن بىرگە باعالادىق. قازىر مۇنىڭ سوعىسقا اينالعانى اسىرەسە كوپتەگەن قالالاردا بايقالادى.

www.24.kz