كوكتەمنىڭ العاشقى كۇندەرىندە اۋا رايى قانداي بولادى؟

نۇر-سۇلتان. قازاقپارات - قازگيدرومەت 1، 2 جانە 3-ناۋرىزعا ارنالعان اۋا رايى بولجامىن جاريالادى.

سينوپتيكتەردىڭ مالىمەتىنشە، كوكتەمنىڭ العاشقى كۇندەرىندە قازاقستان اۋماعىندا تۇراقسىز اۋا رايى بولادى. فرونتالدى اۋا بولىكتەرىنىڭ وتۋىنە بايلانىستى سولتۇستىك جارتىسىندا قار تۇرىندە جاۋىن- شاشىن، بوران بولىپ، جەل كۇشەيىپ، وڭتۇستىگىندە نايزاعاي ويناپ، جاڭبىر جاۋادى. سونداي- اق، ەل اۋماعىندا تۇمان ءتۇسىپ، كوكتايعاق بولادى.

«اۋا تەمپەراتۋراسى تومەندەيدى: باتىستا تۇندە 2...10 گرادۋسقا دەيىن تومەندەيدى، كۇندىز 2...15 گرادۋسقا دەيىن جىلى؛ رەسپۋبليكانىڭ سولتۇستىگىندە، شىعىسىندا جانە ورتالىعىندا تۇندە تەرمومەتر باعاندارى 15...20 گرادۋسقا دەيىن تومەندەسە، كۇندىز 0...10 گرادۋس اياز؛ ەلدىڭ وڭتۇستىك جانە وڭتۇستىك- شىعىس جارتىسىندا تۇندە 0...8 گرادۋس اياز، كۇندىز 5...15 گرادۋس جىلى بولادى»، - دەلىنگەن حابارلامادا.