كارەراسىندا العاش رەت جەڭىلگەن قانات يسلامعا جانقوش تۇراروۆ ءۇن قاتتى
«كەشەگى قانات باۋىرىمنىڭ كەزەكتى كەزدەسۋىندە ەكى تاراپتىڭ دا مىقتىلىعىن كوردىك. جەكپە- جەكتىڭ سوڭىنا دەيىن تاقىمىمىزدى قىسىپ، ۇلكەن ۇمىتپەن وتىردىق. قانەكەڭ ەكەۋمىز مايامي قالاسىندا 3 جىل بىرگە تۇرىپ، ءبىر ناندى تالاي بولىستىك. ەڭبەكقورلىعى مەن ادامگەرشىلىگىمەن ەرەكشەلەنەتىن باۋىر اعاما ەش مويىما دەگىم كەلەدى. بۇل - ۇلكەن سپورت! جەڭىس بار جەردە جەڭىلىس تە بولارى زاڭدىلىق.
الەمگە تانىمال ۇلى بوكسەرلارىمىزدىڭ دا تاريحىندا جەڭىلىستىڭ اشى ءدامى سەزىلگەن. وسى كۇنگە جەتۋدىڭ ءوزى دە ۇلكەن جەڭىس! مۇحيت اسىپ، دەنساۋلىقتى تاۋەكەلگە تىگىپ، ەل نامىسىن قورعاۋدىڭ ارتىندا قانشا تەر مەن كۇشتىڭ جۇمسالاتىنى سەنىمەن مەن جاقسى تۇسىنەمىز. قانەكە باۋىرىم، جەڭىستى كۇندەرىڭ ءالى دە الدا. ەش مويىماي، الداعى جەكپە- جەككە ودان ارى قايراتتى بولىپ ورالاتىنىڭا سەنىمدىمىز! ەلىڭ سەنىمەن ءاردايىم ماقتانادى»، - دەپ جازدى بوكسشى Instagram جەلىسىندەگى پاراقشاسىندا.
ەسكە سالايىق، 26-اقپاندا قانات يسلام (28-0، 22 ك و) ورتا سالماقتاعى WBO Global بەلبەۋى ءۇشىن ايقاسىن وتكىزىپ، كارەراسىندا العاش رەت جەڭىلدى. بۇل ايقاس ا ق ش-تىڭ پلانت- سيتيدەگى بوكس كەشىندە ءوتتى. ال قازاق بوكسشىسىنىڭ قارسىلاسى ۇلى بريتانيالىق دجيممي كەللي (25-2، 10 ك و) بولدى. ون راۋند قورىتىندىسى بويىنشا تورەشىلەر جەڭىستى بريتانيالىققا بەردى.
