قىرعىز تاراپى ۋاعداعا قاراماستان سۋدى كەلىسىلگەن كولەمدە بەرمەۋى مۇمكىن - ۆيتسە-مينيستر
بۇل تۋرالى ق ر ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ ايتتى، دەپ حابارلايدى قازاقپارات ءتىلشىسى.
«سۋ از بولعاندا 2021 -جىلعى ۆەگەتاتسيالىق كەزەڭ وڭتۇستىك وڭىرلەردە وتە قيىن ءوتتى. ۋاقىتىلى قابىلدانعان شارالاردىڭ ناتيجەسىندە فەرمەرلەردى كوپ شىعىنسىز سۋارمالى سۋمەن قامتاماسىز ەتۋگە مۇمكىندىك تۋدى. وسى جىلدىڭ ۆەگەتاتسياسى دا قيىن جاعدايدا وتەدى. الماتى وبلىسىندا سۋارۋ الاڭى 472 مىڭ گەكتاردى قۇرايدى. سۋ رەسۋرستارىنىڭ تاپشىلىعىن ازايتۋ ماقساتىندا وبلىس اكىمدىگى ىلعال سىيىمدى داقىلداردىڭ، ونىڭ ىشىندە بالقاش اۋدانىندا كۇرىشتىڭ 1 مىڭ گەكتار ەگىستىگىن تومەندەتۋدى جوسپارلاپ وتىر. وبلىستىڭ بارلىق سۋ قويمالارى جيناقتاۋ رەجيمىندە»، - دەدى ول مينيسترلىكتىڭ القا ماجىلىسىندە.
ونىڭ اتاپ وتۋىنشە، جامبىل وبلىسى بويىنشا سۋارۋ الاڭى - 182 مىڭ گەكتار.
«قىرعىز تاراپىمەن ۋاعدالاستىققا قاراماستان، مەملەكەتارالىق سۋ وبەكتىلەرى بويىنشا كەلىسىلگەن كولەمدى تولىق الماۋ قاۋپى بار. بۇدان باسقا، وبلىس بويىنشا سۋارۋ جەلىلەرىن قايتا قۇرۋ بويىنشا اۋقىمدى جۇمىستار جۇرگىزىلۋدە. سۋارمالى سۋدى بەرۋ اينالما كانالدار ارقىلى جۇزەگە اسىرىلاتىن بولادى. بۇل تيىسىنشە سۋدىڭ جوعالۋىنا اكەلەدى»، - دەدى ۆيتسە-مينيستر.
وسىعان بايلانىستى ول وبلىس اكىمدىگىنە سۋ ۇنەمدەۋ تەحنولوگيالارىن بارىنشا قولدانۋ، سونداي-اق سۋارۋ تەحنولوگيالارىن ساقتاۋ بويىنشا فەرمەرلەرمەن ءتۇسىندىرۋ جۇمىستارىن جۇرگىزۋ ۇسىنىلعانىن ايتتى.
«كەزەكتىلىكتى ساقتاي وتىرىپ، سۋ اينالىمى ادىسىمەن شارۋاشىلىقتار اراسىندا سۋ ءبولۋ جۇمىسى جالعاسادى. جالپى، وسى ەكى وبلىس بويىنشا الداعى ۆەگەتاتسيا وتكەن جىلدىڭ دەڭگەيىندە وتەدى دەپ جوسپارلانعان»، - دەدى سەرىك قوجانيازوۆ.
