ەۋروپالىق وداق ۋكرايناعا قارۋ- جاراق پەن اتقىش ۇشاقتار جەتكىزەدى

نۇر-سۇلتان.قازاقپارات - «كرەمل باسشىسى ۆلاديمير ءپۋتيننىڭ رەسەي اسكەرىنىڭ تەجەۋ كۇشتەرىن ەرەكشە رەجيمگە كوشىرۋ تۋرالى شەشىمى ەۋروپالىق وداققا جاڭا سانكتسيالار ەنگىزۋگە ەش كەدەرگى جاساي المايدى».

بۇل تۋرالى ەۋرووداق ديپلوماتياسىنىڭ باسشىسى جوزەپ بوررەل مالىمدەدى. ونىڭ ايتۋىنشا، ەۋروقاۋىمداستىقتىڭ جاڭا «قارا تىزىمىنە» رەسەيلىك بيزنەسمەندەر كىرەدى. سونداي- اق رەسمي بريۋسسەل ۋكرايناعا قارۋ- جاراق پەن اتقىش ۇشاقتار بەرۋگە شەشىم قابىلدادى.

جوزەپ بوررەل، ە و ديپلوماتياسىنىڭ باسشىسى:

- ۋكراينا اسكەرىنە 450 ميلليون ەۋروعا قارۋ- جاراق جانە 50 ميلليون ەۋروعا جانارماي مەن قورعانىس زاتتارىن بەرۋگە شەشىم قابىلدادىق. بۇل قاراجات بەيبىتشىلىك جونىندەگى ۇكىمەتارالىق ەۋروپا قورىنان بولىنەدى. ءبىز مۇنداي قادامعا تاريحتا العاش رەت بارىپ وتىرمىز. بۇل شەشىمدى ەۋرووداق ەلدەرىنىڭ بارلىق سىرتقى ىستەر مينيسترلەرى ماقۇلدادى.

سونىمەن قاتار، بوررەل ەۋرووداق رەسەيدى SWIFT- تەن تولىق اجىراتا المايدى، ويتكەنى كوپتەگەن رەسەيلىك كومپانيالاردىڭ جۇمىسى باسقا ەلدەردىڭ ەكونوميكاسىمەن تىعىز بايلانىستى دەيدى. ديپلوماتيا باسشىسى «ەۋرووداق يرانمەن قاتىستى جاعدايدان ساباق الىپ، ادامدار تۋعان- تۋىسىنا اقشا جىبەرىپ، قاجەت زاتتاردى ساتىپ الۋى ءۇشىن رەسەيدىڭ قارجى جۇيەسىنە ءسال دە بولسا جۇمىس ىستەۋگە مۇمكىندىك بەرىپ وتىر» دەپ ءسوزىن تولىقتىردى.

www.24.kz