ۋكراينادا ەشكىمدى قالدىرمايمىز، بارلىق ازاماتتاردى الىپ شىعامىز – ق ر س ءى م

نۇر- سۇلتان. قازاقپارات – ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۋكراينادان قازاقستان ازاماتتارىن ەۆاكۋاتسيالاۋ قالاي ءجۇرىپ جاتقانى تۋرالى ايتىپ بەردى، دەپ حابارلايدى قازاقپارات ءتىلشىسى.

«ۋكراينادا اسكەري ارەكەتتەر ءجۇرىپ جاتىر. جانە ەلدەن تەك قازاقستان ازاماتتارى عانا ەمەس، باسقا ەل ازاماتتارى دا كەتكىسى كەلەدى. ءبىز قازاقستاندىقتار ءۇشىن بار جاعدايدى جاسايمىز. كيەۆتە 8 عانا ديپلوماتىمىز بار. قازاقستاندىقتاردى پولشا شەكاراسىنا جەتكىزۋدە ەلشىلىك وكىلدەرى بىرگە بارىپ جاتىر. ءبىراق، ماماندارىمىز جەتپەيدى، ەلشىلىكتە دە بىرەۋ قالۋ كەرەك. وتانداستارىمىزدى شەكاراعا جەتكىزگەن سوڭ، ەلشىلىك وكىلدەرى قايتىپ كەلىپ، كەلەسى توپ ادامداردى جولعا الىپ شىعادى» - دەدى ايبەك سمادياروۆ.

ونىڭ ايتۋىنشا، ۋكراينا مەن پولشا شەكاراسىندا قازاقستاندىقتاردى ەلشىلىكتىڭ وكىلدەرى كۇتىپ تۇر.

«ولار ءتىزىم بويىنشا ءبىزدىڭ ازاماتتاردى تەكسەرىپ، ودان ءارى شىعارىپ سالادى. شەكارادا 2 ەلدىڭ دە كەدەن قىزمەتى شۇعىل ءارى توتەنشە رەجيمدە جۇمىس ىستەپ جاتىر. باستىسى ولار تۇسىنىستىكپەن قارايدى جانە وتە سىپايى. ءبىزدىڭ ديپلوماتتار ۋكراينا قالالارى مەن پولشا شەكاراسى اراسىندا جانتالاسىپ ءجۇر. سونداي- اق، جەدەل جەلى جۇمىس ىستەپ تۇرعانىن ەسكە سالايىن. ۋكراينا شەكاراسىنداعى ۇزىنسونار كەپتەلىس 20-40 شاقىرىمدى قۇرايدى. ءبىز ەشكىمدى قالدىرمايمىز، بارلىق ازاماتتاردى الىپ شىعامىز»، - دەيدى ول.