رەسەيگە سالىنعان سانكتسيالار الەمدىك ەكونوميكا ءۇشىن زيان - ساراپشى
ۆاشينگتون مەن لوندون ەۋرووداق سياقتى ماسكەۋگە قارسى ءبىر ەمەس بىرنەشە شەكتەۋ شاراسىن قابىلدادى. رەسەيگە سانكتسيا سالعانداردىڭ قاتارىندا اۆستراليا، كانادا، جاپونيا دا بار. كانبەررا رەسەيدىڭ 62 كومپانياسى مەن ءىرى بانكتەرىنە جانە جەكە ازاماتتتار مەن ولاردىڭ وتباسىلارىن شەكتەۋ ەنگىزسە، وتتاۆا رەسەيگە تاۋار تاسىمالدايتىن بارلىق كانادالىق كومپانيالاردىڭ ليتسەنزيالارىنىڭ كۇشىن جويادى. ال جاپونيا رەسەيلىك بانكتەردىڭ كاپيتالىن بۇعاتتاپ، ۆيزا بەرۋدى توقتاتپاق. ءبىراق ماسكەۋگە قارسى سانكتسيالارعا سالۋعا قارسى شىعىپ جاتقان ەلدەر دە جوق ەمەس. مىسالى، قىتاي بۇل شەكتەۋ شارالارىن ءبىرجاقتى ءارى زاڭسىز دەپ سىنعا الدى.
اسەل نازاربەتوۆا، ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ءبولىم باسشىسى:
- ارينە بۇل سانكتسيالاردىڭ سول رەسەيدىڭ ەكونوميكاسىمەن تىعىز بايلانىستى مەملەكەتتەر ءۇشىن زيانى جاناما تۇردە بولادى، سونداي- اق ىقپالى، سەبەپ- سالدارى بولاتىندىعى بەلگىلى. بۇل تەك قانا رەسەيدىڭ كورشىلەس مەملەكەتتەرى نەمەسە ەكونوميكالىق ۇيىم اياسىنداعى ەلدەر ءۇشىن عانا ەمەس، بۇل سانكتسيالار الەمدىك ەكونوميكا ءۇشىن زيانىن ايتۋىمىزعا بولادى. سەبەبى قازىرگى تاڭدا جاھاندانۋ داۋىرىندە مەملەكەتتەردىڭ بارلىعىنىڭ ەكونوميكالارى بولسىن، جالپى ءوزارا بايلانىستىلىق، ءوزارا تاۋەلدىلىك دەگەن جوعارى.
مىسالى، ەگەر رەسەي قازىر ءوزىنىڭ شيكىزات كوزىن باتىس ەلدەرىنە شىعارمايتىن بولسا، ولاردىڭ دا ەكونوميكاسىنا زاردابى بولادى. سوندىقتان سانكتسيالاردى ەنگىزبەستەن بۇرىن مەملەكەتتەر بارلىق تاۋەكەلدەرىن، مۇمكىن بولار جولدارىن قاراستىرىپ، شەشىم قابىلدايدى. سەبەبى بۇدان رەسەي ەكونوميكاسى عانا ەمەس، باسقا دا ۇلتتىق ەكونوميكالار بولسىن، ايماقتىق، عالامدىق ەكونوميكالار بولسىن زاردابى بولاتىنى بەلگىلى.
www.24.kz
