پولشاعا جەتكەن قازاقستاندىقتاردىڭ العاشقى لەگى ەلگە بۇگىن ۇشادى
وسى ورايدا العاشقى رەيستىڭ قاشان بولاتىنى ايتىلدى، دەپ حابارلايدى قازاقپارات ءتىلشىسى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
«العاشقى رەپاترياتسيالىق رەيس 27-اقپاندا ق ر ازاماتتارىنىڭ نەگىزگى بولىگى كاتوۆيتسە قالاسىنا (پولشا) كەلگەننەن كەيىن جۇزەگە اسىرىلادى دەپ كۇتىلۋدە. الداعى ۋاقىتتا باسقا دا رەپاترياتسيالىق رەيستەر ۇيىمداستىرۋ جوسپارلانعان. وسىعان بايلانىستى ۋكراينانىڭ ءارتۇرلى قالالارىنداعى قازاقستاندىقتاردان قازاقستان رەسپۋبليكاسىنىڭ كيەۆتەگى ەلشىلىگىنە حابارلاسۋدى جانە ءوزىنىڭ ورنالاسقان جەرى تۋرالى حابارلاۋدى سۇرايمىز. مۇمكىندىك بولعان جاعدايدا، پولشا شەكاراسىنا دەيىن ۇيىمداسقان تۇردە جەتۋ ءۇشىن لۆوۆ نەمەسە كيەۆ قالالارىنا ءوز كۇشىمەن بارۋدى ۇسىنامىز»، - دەگەن حابار تاراتتى ق ر س ءى م.
مينيسترلىكتىڭ حابارلاۋىنشا، قازاقستان ازاماتتارىنا قاجەتتى كومەكتىڭ بارلىعى كورسەتىلەدى.
«جول-كولىك جاعدايىنىڭ كۇردەلى بولۋىنا جانە ۋكرايناداعى اسكەري ارەكەتتەردىڭ جالعاسۋىنا بايلانىستى بۇل قيىندىق تۋدىرۋ مۇمكىن. مۇنداي جاعدايدا وزدەرىڭىز ورنالاسقان مەكەندەرىڭىزدە قالۋدى، ق ر ەلشىلىگىمەن جانە قۇرمەتتى كونسۋلدىقتارىمەن ۇنەمى بايلانىستا بولۋدى سۇرايمىز. جاعداي انىقتالعاننان كەيىن ازاماتتارىمىزعا بارلىق قاجەتتى كومەك كورسەتىلەدى»، - دەلىنگەن رەسمي حابارلامادا.
سونداي-اق، اتالعان ۆەدومستۆودان «اتامەكەن» ۇ ك پ-مەن بىرلەسىپ، ۋكراينا اۋماعىندا قالعان قازاقستاندىق اۋىر جۇك كولىگى جۇرگىزۋشىلەرى تۋرالى مالىمەتتەر جينالىپ، ولاردى الىپ شىعۋدىڭ امالى قارالىپ جاتقاندىعى ايتىلدى.
