رۋبلدىڭ اۋىتقۋىنىڭ تەڭگەگە ىقپالىن تومەندەتۋ ءۇشىن ۇلتتىق بانك ۆاليۋتالىق ينتەرۆەنسيالار جۇرگىزبەك
2022 -جىلعى 26-اقپاندا اق ءۇي ەۋروپالىق كوميسسيا، فرانسيا، گەرمانيا، يتاليا، ۇلى بريتانيا، كانادا جانە ا ق ش كوشباسشىلارىنىڭ رەسەيگە قاتىستى بۇدان بىلايعى شەكتەۋلى ەكونوميكالىق شارالار تۋرالى بىرلەسكەن مالىمدەمەسىن جاريالادى.
اتاپ ايتقاندا، شارالار رەسەيدىڭ جەكەلەگەن بانكتەرىن SWIFT حابارلارىمەن الماسۋ جۇيەسىنەن الىپ تاستاۋدى جانە باسقا شەكتەۋ شارالارىن، ونىڭ ىشىندە رەسەيدىڭ ورتالىق بانكىنە قاتىستى شەكتەۋ شارالارىن ەنگىزۋدى كوزدەيدى.
سونىمەن قوسا، S&P Global Ratings رەيتينگتىك اگەنتتىگى حالىقارالىق سانكسيالار ەنگىزىلگەننەن كەيىن رەسەيدىڭ ۇزاق مەرزىمدى رەيتينگىن ينۆەستيسيالىق ەمەس رەيتينگ دەڭگەيىنە (BB+) دەيىن تومەندەتتى. ۇلتتىق بانك ناقتى ۋاقىت رەجيمىندە ەلدەر ۇكىمەتتەرىنىڭ، ورتالىق بانكتەرى مەن قارجى ۇيىمدارىنىڭ رەسمي مالىمدەمەلەرىن قاداعالاپ وتىرادى جانە رەسەيگە قارسى جاڭا سانكسيالاردىڭ قازاقستاننىڭ قارجى جۇيەسىنە ىقپال ەتۋ دارەجەسىن باعالايدى.
الداعى كۇندەرى رەسەي رۋبلىنىڭ باعامى ايتارلىقتاي قۇبىلمالىلىقپەن سيپاتتالادى جانە كوپ جاعدايدا نارىق ىقپالىنا جانە تاۋەكەل- سەنتيمەنتتىڭ وزگەرۋىنە ۇشىراپ، از دارەجەدە ىرگەلى فاكتورلاردى كورسەتەتىن بولادى. رۋبلدىڭ شامادان تىس اۋىتقۋىنىڭ تەڭگەگە نەگىزسىز ىقپال ەتۋىن تومەندەتۋ ءۇشىن ۇلتتىق بانك قاجەت بولعان جاعدايدا ۆاليۋتالىق ينتەرۆەنسيالار جۇرگىزەتىن بولادى.
مۇنداي ينتەرۆەنسيالاردىڭ كولەمى مەن جيىلىگى ىشكى ۆاليۋتا نارىعىنداعى جاعدايعا بايلانىستى بولادى.
بۇل رەتتە تەڭگەنىڭ يكەمدى باعامى سىرتقى سەكتور تاراپىنان تاۋەكەلدەردى ىسكە اسىرۋ اياسىندا ماڭىزدىلىعى ارتقان التىن- ۆاليۋتا اكتيۆتەرىنىڭ ساقتالۋىن قامتاماسىز ەتۋگە مۇمكىندىك بەرەدى. التىن- ۆاليۋتا اكتيۆتەرىنىڭ اعىمداعى دەڭگەيى يمپورتتىڭ 8,8 ايىن قامتاماسىز ەتۋگە مۇمكىندىك بەرەدى. ترانسپارەنتتىلىك قاعيداتى اياسىندا ۇلتتىق بانك جۇرگىزىلگەن وپەراتسيالاردىڭ كولەمىن جاريالايدى. سىرتقى نارىقتارداعى احۋالدىڭ دامۋىنا قاراي ۇلتتىق بانك اشىق كوممۋنيكاتسيالاردى جۇرگىزۋدى جالعاستىرادى.
