استانادا قوعامدىق كولىكتە ءجۇرۋ قۇنى وسە مە
بۇل تۋرالى City Transportation Systems ج ش س-نىڭ باسقارما ءتوراعاسى بەكمىرزا يگەنبەردينوۆ ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسى ە ا ە و مۇشە ەلدەرگە داعدارىسقا قارسى شارالار ازىرلەۋ ءۇشىن جۇمىس توبىن قۇرۋدى ۇسىندى. بۇل باستامانى كەشە ەۋرازيالىق ەكونوميكالىق وداققا مۇشە مەملەكەتتەردىڭ ۇكىمەت باسشىلارىمەن كەزدەسۋىندە ايتتى. بۇگىندە سوڭعى وقيعالارعا بايلانىستى ۆاليۋتا باعامىنىڭ تۇراقسىز جاعدايى جانە نارىقتاعى باسقا دا جاعىمسىز سالدارلار بايقالىپ وتىر. وسى ورايدا ءبىزدىڭ كومپانيا مەملەكەت باسشىسىنىڭ باستاماسىن قولداۋ تۋرالى شەشىم قابىلدادى. قوعامدىق كولىكتەگى جول ءجۇرۋ قۇنىنىڭ وزگەرۋىنە جول بەرمەۋ بويىنشا بارلىق قاجەتتى شارالاردى قابىلدايتىنىن مالىمدەيمىز»، - دەپ جازدى بەكمىرزا يگەنبەردينوۆ Facebook پاراقشاسىندا.
ونىڭ ايتۋىنشا، ەلوردادا قوعامدىق كولىك باعاسىنا قاتىستى ءتيىمدى تاريف ەنگىزۋ مۇمكىندىگى پىسىقتالادى.
« ءبىز ءۇشىن قوعامدىق كولىكتى پايدالانۋشىلاردىڭ سابىرلىق ساقتاپ، ۇرەيلەنبەگەنى ماڭىزدى. جولاۋشىلاردىڭ تاسىمالداۋ ماسەلەسى تۇراقتى باقىلاۋدا. جۇمىسىمىزدى شتاتتىق رەجيمدە، وزگەرىسسىز جالعاستىرا بەرەمىز. تۇرعىنداردىڭ تىنىس- تىرشىلىگىن قامتاماسىز ەتەتىن باسقا دا كاسىپورىنداردى تۇراقتىلىق ەستافەتاسىن قابىلداۋعا جانە سول ارقىلى مەملەكەت باسشىسىنىڭ باستاماسىن قولداۋعا شاقىرامىز»، - دەيدى ول.
سونداي-اق، CTS كومپانياسىنىڭ باسشىسى ەلوردانىڭ قوعامدىق كولىكتەرىندە جەڭىلدىكپەن جۇرەتىن جولاۋشىلاردىڭ بارىن ايتتى. ولاردىڭ قاتارىندا، زەينەتكەرلەر، ەرەكشە جانە مۇگەدەك جاندار، كوپ بالالى انالار جانە 18 جاسقا دەيىنگى بالالار مەن جاسوسپىرىمدەر بار.
