قانات يسلام كاسىپقوي بوكستا تۇڭعىش رەت جەڭىلىس تاپتى

نۇر-سۇلتان. قازاقپارات - بۇگىن قازاقستاندىق بوكسشى قانات يسلام كاسىپقوي بوكستا تۇڭعىش رەت جەڭىلىس تاپتى، دەپ حابارلايدى قازاقپارات ءتىلشىسى.

ول WBO Global چەمپيوندىق بەلبەۋىن ءۇشىن بريتاندىق دجيممي كەلليمەن (25-2، 10 ك و) جۇدىرىقتاستى. 10 راۋندقا سوزىلعان جەك-جەك قورىتىندىسىندا تورەشىلەر ءبىراۋىزدان كەلليدى جەڭىمپاز دەپ تاپتى.

وسىلايشا، قازاقستاندىق كاسىپقوي بوكسشى العاش رەت قارسىلاسىنا جول بەردى. جەكپە-جەك كەشى پلانت-سيتيدە (فلوريدا شتاتى، ا ق ش) ءوتتى.

ەستەرىڭىزگە سالا كەتەيىك، قانات يسلام العاشقى جوسپار بويىنشا 2022 -جىلدىڭ 21-قاڭتارىندا جۇدىرىقتاسۋى كەرەك بولاتىن. الايدا، كوروناۆيرۋس شەكتەۋلەرىنە بايلانىستى جارىس كەيىنگە شەگەرىلدى. دجيممي كەللي سوڭعى كەزدەسۋىن وتكەن جىلدىڭ 12-جەلتوقسانىندا ءوزىنىڭ وتانداسى گارري مەتتيۋسپەن (16-50-3، 2 ك و) وتكىزىپ، قارسىلاسىن نوكاۋتقا جىبەرگەن.

ال قانات يسلام سوڭعى جەكپە-جەگىن وتكەن جىلى 20-اقپان كۇنى ماياميدە وتكىزدى. ەكۆادورلىق بوكسشى دجەيسون ميندۋمەن (14-5-1، 8 ك و) بولعان جەكپە-جەكتىڭ جەتىنشى راۋندىندا قارسىلاسىن تەحنيكالىق نوكاۋتپەن جەڭگەن.

اۆتور: كۇنسۇلتان وتارباي