پەسكوۆ: پۋتين ۋكراينامەن كەلىسسوز جۇرگىزۋ ءۇشىن مينسكىگە دەلەگاتسيا جىبەرۋگە دايىن
بۇل تۋرالى تىلشىلەرگە ر ف پرەزيدەنتىنىڭ باسپا ءسوز حاتشىسى دميتري پەسكوۆ مالىمدەدى، دەپ حابارلايدى قازاقپارات ت ا س س اقپارات اگەنتتىگىنە سىلتەمە جاساپ.
«ۆلاديمير پۋتين ۋكراينا پرەزيدەنتى ۆلاديمير زەلەنسكيدىڭ ۇسىنىسىنا جاۋاپ رەتىندە ۋكراينالىق تاراپپەن كەلىسسوز جۇرگىزۋ ءۇشىن مينسكىگە قورعانىس مينيسترلىگى، سىرتقى ىستەر مينيسترلىگى جانە پرەزيدەنت اكىمشىلىگى وكىلدەرىنەن قۇرالعان رەسەيلىك دەلەگاتسيانى جىبەرۋگە دايىن»، - دەدى ول.
كرەمل وكىلىنىڭ ايتۋىنشا، بەلارۋس پرەزيدەنتى الەكساندر لۋكاشەنكو پۋتينگە مينسك رەسەي مەن ۋكراينا اراسىنداعى كەلىسسوز جۇرگىزۋ پروتسەسى ءۇشىن بارلىق قاجەتتى جاعداي جاساۋعا دايىن ەكەنىنە سەندىردى، دەپ حابارلايدى ت ا س س.
ۋكرينفورم بۇعان دەيىن حابارلاعانداي، ۋكراينا پرەزيدەنتى ۆلاديمير زەلەنسكي رەسەي فەدەراتسياسىنىڭ پرەزيدەنتى ۆلاديمير پۋتيندى كەلىسسوز ۇستەلىنە وتىرۋعا شاقىردى.
ول ءتيىستى ۇندەۋىن جۇما كۇنى سويلەگەن سوزىندە جاسادى.
«مەن رەسەي فەدەراتسياسىنىڭ پرەزيدەنتىنە تاعى دا ءسوز ارنايمىن. بۇكىل ۋكراينادا شايقاس ءجۇرىپ جاتىر. ادامدار ءولىمىن توقتاتۋ ءۇشىن كەلىسسوز ۇستەلىنە وتىرايىق»، - دەدى زەلەنسكي.
ەسكە سالا كەتەيىك، رەسەي پرەزيدەنتى ۆلاديمير پۋتين بەيسەنبى كۇنى تاڭەرتەڭ ۋكراينادا ارنايى اسكەري وپەراتسيا جۇرگىزۋ تۋرالى شەشىم قابىلداعانىن ايتتى.
ۋكراينا پرەزيدەنتى ۆلاديمير زەلەنسكي ەل حالقىنا ۇندەۋ جاريالاپ، ۋكراينا اۋماعىندا اسكەري جاعداي رەجيمىن ەنگىزدى.
ايتا كەتەيىك، قازاقستان ۋكراينادان ەل ازاماتتارىن ەۆاكۋاتسيالاپ جاتىر.
