قاڭتار قاسىرەتىنە قاتىستى اق پەن قارانى اجىراتا ءبىلۋىمىز كەرەك - قازىبەك مايگەلدينوۆ
بۇل تۋرالى قازاقپاراتقا سۇحبات بەرگەن «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باسقارما ءتوراعاسى قازىبەك مايگەلدينوۆ ايتتى، دەپ حابارلايدى قازاقپارات ءتىلشىسى.
«مەنىڭشە، قازىرگى تاڭدا ەڭ باستىسى اق پەن قارانى اجىراتا ءبىلۋىمىز كەرەك. اق پەن قارا دەگەنىمىز دەگەن نە؟ قارالى قاڭتار كۇندەرىندەگى وقيعالاردى قاراپ وتىرساق، ارينە باستاپقىدا ءبارى بەيبىت شەرۋ بولىپ باستالدى. وعان ەشكىم كۇمان كەلتىرمەيدى. ءبىراق، 10- قاڭتاردا الماتىدان تاراعان سۋرەتتەر، ۆيدەولاردان كورگەنىمىزدەي قانشاما ۇيلەردىڭ، عيماراتتاردىڭ، جەدەل جاردەم كولىكتەرىنىڭ ورتەنىپ، استان-كەستەڭ بولعانى، سوڭعى مالىمەتتەرگە سايكەس 200 دەن استام بەيبىت ازاماتتىڭ ءولىمى ناقتى قىلمىس جاسالعانىن كورسەتەدى. ال قىلمىسكەر كىم؟ ول جەردە ۇيىمداسقان قىلمىستىق توپتاردىڭ، ەكسترەميستىك توپتاردىڭ وكىلدەرى بولدى. ونى دا مويىندايمىز. لاڭكەستەر دە بولدى»، - دەدى ول.
ساراپشىنىڭ اتاپ وتۋىنشە، ەڭ باستىسى قىلمىسكەرلەر ءىزىن جاسىرىپ ۇلگەرمەۋى، باسقا جاققا قاشىپ كەتپەۋى ءۇشىن قاقتىعىستار ورىن العان جەردە بولعان كۋاگەرلەردى تەرگەۋ كەرەك.
«ەڭ الدىمەن دالەل كەرەك. قازىرگى ۋاقىتتا باس پروكۋراتۋرا، ىشكى ىستەر مينيسترلىگى اپتا سايىن بريفينگ وتكىزەدى. بريفينگ وتكىزۋدەگى ماقسات نە؟ بريفينگ ماقساتى - 5 مىڭ ادام ۇستالعانىن، 4 مىڭى كىناسىز ەكەندىگى دالەلدەنگەن سوڭ جىبەرىلگەنىن» جەتكىزۋ. ءبىراق، كىنالىلەردى انىقتاۋ ءۇشىن تەرگەۋ جۇمىستارى تەرەڭدەي ءتۇسۋى كەرەك»، - دەدى قازىبەك مايگەلدينوۆ.
وسى رەتتە ول ناۋرىز ايىندا مەملەكەت باسشىسى جولداۋىنان نە كۇتەتىندىگىن دە اتاپ ءوتتى.
«پرەزيدەنت ناۋرىزدىڭ ورتاسىندا بولاتىن جولداۋىندا ناقتى مىنانداي توپتار، مىناداي ادامدار دەپ بەت-پەردەسىن اشسا، بۇل حالىققا العاشقى جاۋاپ بولادى. ءبىراق، تەرگەۋ جۇمىسىندا اسىعۋعا بولمايدى. ويتكەنى، ءبىز ادىلەتتىلىكتى كوپ ىزدەپ، كىناسى جوق ادامدارعا قاتىستى ادىلەتسىزدىككە بارۋىمىز مۇمكىن. وسى ماسەلەگە تەرەڭ ءمان بەرۋ كەرەك. پرەزيدەنت تە ايتىپ ءجۇر. كەز كەلگەن ادامدى كىنالاماس بۇرىن الدىمەن وعان تاعىلعان ايىپ تولىعىمەن دالەلدەنۋى كەرەك. تولىق دالەلدەنگەندە عانا ول قىلمىسكەر بولادى. ال وعان دەيىن ول تەك ايىپتالۋشى»، - دەدى ول.
